Бројот на активни случаи секојдневно се зголемува. Според вчера објавените податоци од Институтот за јавно здравје (ИЈЗ), нивниот број во државава достигна 18.498 од кои повеќе од пола – 9.714 се регистрирани во Скопје. Расте и бројот на реинфекции.
Од направени 6.353 тестови, регистрирани се нови 2.051 случај со ковид-19 од кои 276 реинфекции, починаа седум лица, а оздравеа 747 пациенти.
Директорот на Институтот за имунологија, д-р Александар Петличковски синоќа во телевизиско гостување рече дека околу сме околу пикот на сојот омикрон, имајќи предвид дека и во земјите во соседството и во земјите во Западна Европа, овој последен бран на корона инфекцијата се ширеше многу брзо и многу побрзо стивнуваше. Тој истакна дека не очекува во следните месеци и години коронавирусот да биде сериозен проблем за човештвото. Препорачува да се носат маски N95.
Вкупниот број ковид-дијагностицирани лица во земјава од почетокот на епидемијата изнесува 249.704, бројот на оздравени пациенти е 223.053, а на починати е 8.153.
Заради ситуацијата со ковид-19, Германија ја врати Северна Македонија на листата на ризични земји, а нови ковид протоколи има за влез во Финска и во Хонг Конг.
Со најновата одлука на германските власти, од македонските државјани при влез во Германија се бара електронско пријавување и поседување потврда за вакцинација или за прележан ковид-19 или негативен ПЦР тест. За лицата кои не биле заразени со ковид и не се вакцинирани, следува 10-дневен карантин, а можат да бидат ослободени најрано на петтиот ден со тестирање за ковид 19. Од оваа мерка се ослободени невакцинираните деца до шест години, на кои карантинот им се прекинува по пет дена.
Со нов ковид-протокол е и Република Финска. Сите лица, вклучувајќи и наши државјани кои не можат да се вакцинираат против ковид 19 од медицински причини, можат да влезат во Финска доколку имаат лекарско уверение кое го покажува тоа, заедно со потврда за негативен ковид-тест не постар од 48 часа. Сите останати (освен оние со регулиран престој) кои пристигнуваат во Финска и натаму се задолжени да приложат доказ за целосна вакцинација или оздравување од ковид 19 (во изминатите шест месеци), заедно со негативен тест за ковид-19 (не постар од 48 часа).
Истовремено, Владата на Хонг Конг донесе одлука за измена на условите за влез во земјата, согласно која Република Северна Македонија се наоѓа во Група А земји каде се детектирани случаи на омикрон. Поради тоа, се ограничува влез на наши државјани и странци (кои не се резиденти на Хонг Конг), а кои во изминатите 21 ден престојувале во Северна Македонија. Дополнително, дозволен е влез за резиденти на Хонг Конг, но со 21 дневен задолжителен карантин и 6 ПЦР теста, информираат од МНР.