Специјалното јавно обвинителство од Кривичниот суд побарал да бидат казнети девет одговорни лица од институциите кои не соработувале со обвинителството и не ги доставувале бараните податоци, а судот одобрил само едно од овие барања, објави „Телма“.
Според извори на телевизијата казнет е директорот на УБК Владимир Атанасовски кој доколку биде потврдена одлуката ќе треба да ја плати 2500 евра. Речиси пола од барањата за казнување на СЈО се однесуваат на директорот на УБК, додека останатите се за функционери во УБК а еден предлог кој што е одбиен е за министерот за транспорт и врски.
Како дел од истрагата за предметот Трезор, СЈО побарало податоци од МВР дали набавената опрема преку фирмата „Финзи“ е инсталирана во објектите на МВР како и попис за видот и количината на оваа електронска и комуникациска опрема. Барањето било доставено во УБК, а директорот одговорил дека бараните податоци се суптилни и со несоодветно постапување може да се загрози или нанесе непоправлива штета на државата. Судијката ги прифатила аргументите на УБК и го одбила како неосновано барањето на СЈО да биде казнет директорот на УБК Владимир Атанасовски.
Во останатите предмети СЈО барало казни затоа што УБК не им доставила потребни информации за тоа дали во периодот од 2008 до 2015 управата изготвувала месечни извештаи за функционирање на системите на за следење на информации, колкав е бројот на следени телефонски разговори и интернет комуникација со судска наредба , барале податоци за поранешен вработен во Управата кој според иницијалите е Звонко Костовски од ПУЧ, за потребите на предметот Тврдина сите наредби за посебни истражни мерки.
УБК е институцијата за која неколку пати од СЈО посочуваат дека прави најмногу опструкции во нивните истраги.
Најголем дел од одлуки на кривичен со кои се одбиваат предлозите за казнување функционери се потпишани од судијките Елена Илиевска Јосифовиќ и Александра Поп Стефанија.