Секое лошо за добро би бил најоптимистичкиот коментар по дуелот со Шпанија на Светското првенство во Германија и во Данска. Како израз на надеж, се разбира пред одлучувачкиот настап против Исланд за главна фаза. Нема место за очајување кај македонските ракометари по убедливиот и однапред прежален пораз во „Олимпијахале“. Желба постоеше кај составот на Раул Гонзалез, се виде тоа во првото полувреме како што се виде во второто дека тимот на Жорди Рибера е, сепак, преголем залак.
„Влеговме без калкулации како што и најавивме. Бевме добри и расположени во првото полувреме, во второто се случи тоа што се случи. Дали е за добро или за лошо ќе видиме утре во мечот со Исланд што за нас е како финале. Полошо ќе беше ако држевме резултатски чекор до финишот и во него да загубевме“, изјави Кире Лазаров по вториот пораз на СП.
Шпанија ја реши Македонија за три минути во второто полувреме. Постигна пет брзи гола и не дозволи ниту за миг комотната предност да биде загрозена. Покрај Македонија и Исланд (18 ч.), утре во групата ќе играат и Јапонија – Бахреин од 15.30 часот и Хрватска – Шпанија во дербито од 20.30 часот.