Тежок удар за Атлетико Мадрид во Дортмунд. Борусија си поигра со составот на Диего Симеоне и го испрати од „Сигнал Идуна Парк“ со 4:о во меч од третото коло во Лигата на шампиони на УЕФА. Двоен стрелец за тимот на Лусиен Фавре беше Рафаел Гвереро во 73. минута и во 89. минута, Витсел погоди во 38. минута, гостинската мрежа ја затресе и Жадон Санчо во 83. минута. „Милионерите“ се лидери на табелата во групата А со 9 бода, три повеќе од екипата од „Ванда Метрополитано“, по бод и, речиси без шанси за осминафинале, имаат Монако и Бриж.
Барселона и без Меси силна за Интер
Барселона и во отсуство на Меси без поголеми проблеми го совлада Интер со 2:0 во еден од двата меча за прво место во групата Б. Каталонците поведоа со погодокот на Рафиња во 32. минута, печат на трите бода стави Жорди Алба во 83. минута. „Нероаѕурите“ солидно парираа на „Камп Ноу“, неколкупати се заканија преку Икарди, Весино и Политано, но решение за матирање на Тер Штеген не најдоа.
Барселона е водечка на табелата со максимален ефект (9 бода) пред Интер кој има шест, ПСВ Ајндховен и Тотенхем имаат по бод.
Ди Марија сочува бод во Париз, Ливерпул пресилен за Црвена звезда
Екипата на ПСЖ спаси бод во судиското надополнување во мечот со Наполи. Конечни 2:2 на „Паркот на принцевите“ во Париз, а најзаслужен за тоа беше Анхел ди Марија кој спречи сензационална победа на калчолигашот во 93. минута. Претходно за „светците“ погоди Руи (автогол) во 61. минута. Гостите од Италија беа ориентирани на контри против ѕвездениот состав на Томас Тухел и одлично ја спроведуваа таквата тактичка определба. На тој начин поведоа во 29. минута со погодокот на Лоренцо Инсиње за 1:0 и во 77. минута преку Дрис Мертенс за 2:1. Но, аргентинскиот крилен напаѓач на домашните ги спречи да се вратат на Апенините со цел плен од Франција.
Ливерпул, сепак, се покажа пресилен за Црвена звезда. „Црвените“ триумфираа со 4:0 за преземање на лидерската позиција во групата Ц. Серијата на голови на „Енфилд“ ја отвори Роберто Фирмињо во 20. минута, Мо Салах беше во улога на реализатор во 45. минута и во 51. минута од пенал, а точката на средбата стави Садио Мане во 80. минута, четири минути по промашениот пенал.
Касилјас го разбуди Порто во Москва
Фудбалерите на Локомотив Москва тргнаа на се или ништо пред своите гледачи против Порто, свесни дека само победа ги остава во игра за осминафинале, но согореа во желбата за победа. Португалскиот тим на крајот се радуваше со 3:1, а негов двигател во Русија беше голманот Икер Касилјас кој го одбрани ударот од белата точка на Мабнуел Фернандез во 10. минута и од тој момент се одеше во полза на „сино-белите“ од стадионот „Драгао“.
Муса Марега беше сигурен егзекутор на најстрогата казна во 26. минута, Ектор Ерера зголеми на 2:0 во 35. минута на што „армејците“ успеаја да возвратат преку Антон Миранчук во 38. минута за 2:1 и надеж дека можат до бод или сите три во продолжение на средбата. Меѓутоа веднаш по враќање од соблекувалните, нов студен туш за домашните фанови. Хезус Корона реализира за 3:1 за Порто, слика на семафорот што остана непроменета до крајот.
Единствениот меч без голови во третото коло се одигра во Истанбул меѓу екипите на Галатасарај и Шалке.
Лига на шампиони
Резултати, 3 коло
Група А
Борусија Дортмунд – Атлетико Мадрид 4:0, Бриж – Монако 1:1
Табела: Борусија Дортмунд 9, Атлетико Мадрид 6, Монако 1, Бриж 1.
Група Б
Барселона – Интер 2:0, ПСВ Ајндховен – Тотенхем 2:2
Табела: Барселона 9, Интер 6, ПСВ Ајндховен 1, Тотенхем 1.
Група Ц
Ливерпул – Црвена звезда 4:0, ПСЖ – Наполи 2:2
Табела: Ливерпул 6, Наполи 5, ПСЖ 4, Црвена звезда 1.
Група Д
Локомотив Москва – Порто 1:3, Галатасарај – Шалке 0:0
Табела: Порто 7, Шалке 5, Галатасарај 4, Локомотив Москва 0.