Селекторот на македонската кошаркарска репрезентација, Драган Баиќ, присуствуваше на церемонијалот на одредување на квалификациските групи за Светското првенство 2023, во кои ривали на „црвено-жолтите“ ќе бидат Шпанија, Грузија и Украина.
Добивме група која не изгледа атрактивна, но не е ниту лесна. Мојата тренерска филозофија вели дека повеќе сакам противниците да размислуваат за нас, отколку ние за нив. Така и овојпат. Во разговорите со колегите кои се тука во Женева, дознав дека се вложува многу и во Грузија, и особено во Украина. Тоа се сериозни селекции, за шпанската не сакам да дискутирам. Но, за мене не постои зборот предавање. Визијата е јасна. Низ овие натпревари сакаме да дадеме уште поголема минутажа на помладите и сите заедно да уживаме и да напредуваме низ овие квалификациски натпревари, изјави Бајиќ за веб-страницата на КФСМ.
Првопласираните три селекции од групите ќе минат во наредната фаза во квалификациите во која ќе се формираат нови четири групи од кои најдобрите три, или вкупно 12 репрезентации од Стариот континент, ќе обезбедат пласман на завршниот турнир во Индонезија, Јапонија и Филипини во 2023 година.