Со низа протести, меѓу кои и еден против Договорот од Преспа, со обраќање на грчкиот премиер Кирјакос Мицотакис и под силни безбедносни мерки денеска се отвора 84. издание на Меѓународниот саем во Солун.
Центар на економските и политички случувања и вниманието на грчката јавност викендот ќе биде насочено кон Солун каде премиерот на Грција, Кирјакос Мицотакис како и секоја година, со традиционалниот говор на отворањето ќе ги открие следните чекори и активности на неговата влада.
Саемот по традиција е проследен со низа протести, а во пресрет на годинашното издание беа закажани најмалку шест. Двата најголеми синдиката на вработените во приватниот и во државниот сектор ќе одржат заеднички протест, синдикатот на Комунистичката партија ќе протестира посебно, а свои собири закажаа и левичарски здруженија, партии и организации, како и анархистички групи. Одделен протест, преку социјалните мрежи, организираат и лица кои се против Договорот од Преспа. За безбедноста се ангажирани над 3.000 полицајци, а специјални единици во Солун пристигнаа од грчката престолнина.
Општина Солун, според грчката државна телевизија ЕРТ, ги отстранила кантите за отпадоци и контејнерите од улиците каде што е планирано да поминат демонстрантите, а Здружението на трговци побарало од сопствениците на продавници да преземат превентивни мерки.
На Меѓународниот саем под мотото „Претприемништво, иновации и екстровертност“ што ќе трае до 15 септември, ќе учествуваат 1.600 изложувачи, бројка што е поголема во споредба со лани. Претставници ќе има од 18 земји, а Индија е почесна земја.
Грчкиот премиер, Кирјакос Мицотакис, кој од вчера е во Солун, денеска ќе одржи средба со претставниците на управниот одбор на саемот, веднаш потоа ќе ги посети штандовите, а во 20 часот по локално време ќе се обрати на свеченото отворање.