Обвинителството да почне истрага по допрен глас по завршните зборови на Бојан Јовановски-Боки 13 во „Рекет“. Вакво барање испорача Антонио Милошоски од ВМРО-ДПМНЕ на денешната прес-конференција при што се повика на исказ на првообвинетиот во случајот во кој тврдеше дека „поранешниот премиер Зоран Заев му рекол дека СЈО направило лошо со отворање на предметот „Империја“ од причина што Орце Камчев имал под контрола тројца пратеници, а Сашо Мијалков повеќе за гласањето на уставните измени“.

„Она што го сметам за важно во овој случај е дека во телефонот на првообвинетиот во случајот „Рекет“ се тврди дека постои СМС порака од 16 април во минатата година во која господинот бивш премиер Зоран Заев на првообвинетиот му пишал „Дојди да се видиме и ќе ги соочиме доказите“. Се поставува прашањето како дошле доказите за „Рекет“ до бившиот премиер Зоран Заев на 16 април минатата година, кога истиот Зоран Заев тврдеше дека пријавата за „Рекет“ ја направил на 2 мај? – Дали тоа значи дека доказите од Обвинителството прво одат на проверка во владата на СДСМ и кај Зоран Заев, а дури потоа одат во судница?“, запраша Милошоски кој е меѓу осомничените во случајот „Моќник“.

Милошоски на прес-конференција апелира за вештачење на телефонот на Јовановски, меѓутоа и на лидерот на СДСМ, Заев. Во завршните зборови за „Рекет“, првообвинетиот во предметот спомена неколку лица од власта, но и од опозицијата, како и до обвинителката Вилма Русковска која ја обвини за корупција. Таа, пак, пред медиумите и јавноста истакна дека телефонот е извештачен, додека за изнесените обвинувања истакна дека и Јовановски и било кој друг што поседува докази, истите да ги достави.

Неговиот адвокат, пак, Сашо Дуковски рече дека Обвинителството не покажало докази за делото за кое се товари неговиот клиент, Јовановски. Според него, целата постапка се водела со селекција на докази од Обвинителатвото, без да се дадат на увид изјави на сведоци, со нецелосни и незавршени вештачења и наводното тврдење на оштетениот сведок, кој го пријавил случајот.