На иницијатива на министерот за надворешни работи, Никола Димитров, министрите за надворешни работи на земјите од Западен Балкан денеска испратија писмо до Комесарот за трговија Фил Хоган, до Комесарот за соседство и проширување Оливер Вархеји и до Високиот претставник на Европската Унија (ЕУ) и потпретседател на Европската Комисија, Жозеп Борел со барање за изземање на државите од регионот од Регулативата на ЕУ со која одредени медицински продукти за лична заштита беа ставени под режим на извозни рестрикции, односно специјални извозни дозволи.

„Коронавирусот се прошири во сите делови на европскиот континент и за да се победи оваа заедничка закана потребна е солидарност и взаемна соработка. Со оглед дека секаде први на фронтот со коронавирусот се здравствените работници, сите заедно мора да осигураме дека тие ќе ја имаат во секое време и во доволни количини медицинската опрема за лична заштита. Затоа ние, партнерите од регионот се обединивме и итно и предлагаме на Европската комисија во предлогот за ревизија на регулативата која е во тек да предвиди изземање од потребата за специјални извозни дозволи за нашиот регион. Регионот на Западен Балкан е дел од Европа, опкружен со земји членки на ЕУ. Изземањето ќе испрати силен сигнал дека сите ние како Европјани работиме заедно за успешно да се соочиме и да го надминеме овој огромен предизвик“, се вели во заедничкиот допис на министите за надворешните работи на земјите од Западен Балкан до официјалните претставници на ЕУ во Брисел.