Кире Лазаров и ракометната дружина од Македонија се ставија во ситуација да треперат до завршниот звук на сирената во Ескишехир за конечен триумф над Турција со 26:25 во претпоследното коло во квалификациите за ЕП 2020. Тоа значи преземање на првото место во групата 3 со седум бода, еден повеќе од Исланд, и што е најважно петто последователно учество на завршните турнири од 2012 година, вкупно шесто од независноста на државата. Најзаслужен за третата победа во циклусот, на крај, се покажа голманот Никола Митревски кој го одбрани турскиот напад за израмнување.
Македонија добро го отвори натпреварот. Во првиот дел имаше водство од 7:3 и 10:7 пред репрезентативците на Турција да почнат беспоштедно да се борат за секоја педа и топка на теренот. Пожртвуваноста им донесе ефект во финишот на полувремето. Најпрво поведоа со 11:10 за првпат во мечот и на одмор заминаа со 13:11, а во 42. минута имаа и 19:15.
Како пресвртен момент во натпреварот се покажа тајм-аутот на Данило Брестовац по чии совети „црвено-жолтите“ се вратија во егал и на осум минути до крајот во ново водство. Турските ракометари остана фокусирани, борбени и желни за одмазда за поразот во Битола со 27:31, но Митревски се испречи во последната нивна шанса за избегнување на пораз.
Дорук Пеливан беше најефикасен на средбата со десет гола додека лидер во македонската селекција беше капитенот Кире Лазаров со седум погодоци. Пет постигна Филип Талески, по четири реализираа Гоце Георгиевски и Борјан Маџовски.
Грција приреди уште едно изненадување во групата со ремито (28:28) на домашен терен против Исланд. Репрезентација на јужниот сосед е последен ривал на избраниците на Брестовац во циклусот. Мечот е закажан на 16 јуни во Струмица.
Европското првенство во 2020 година ќе се одржи од 10 до 26 јануари во Шведска, Австрија и Норвешка.
Квалификации за ЕП 2020 во ракомет (м)
Група 1
Израел – Германија 25:40
Косово – Полска 23:23
Табела: Германија 10, Израел 4, Полска 3, Косово 3.
Група 2
Швајцарија – Хрватска 28:33
Белгија – Србија 26:37
Табела: Хрватска 9, Швајцарија 6, Србија 4, Белгија 1.
Група 3
Турција – Македонија 25:26
Грција – Исланд 28:28
Табела: Македонија 7, Исланд 6, Турција 4, Грција 3.
Група 4
Летонија – Словенија 25:24
Естонија – Холандија (13 јуни)
Табела: Словенија 8, Летонија 8, Холандија 4 (-1), Естонија 0 (-1).
Група 5
Финска – Чешка 24:26
БиХ – Белорусија 25:31
Табела: Чешка 8, Белорусија 6, БиХ 6, Финска 0.
Група 7
Словачка – Унгарија 20:21
Италија – Русија (13 јуни)
Табела: Унгарија 9, Русија 5 (-1), Италија 4 (-1), Словачка 0.
Група 8
Украина – Данска 30:33
Фарски Острови – Црна Гора (13 јуни)
Табела: Данска 8, Украина 6, Црна Гора 3 (-1), Фарски Острови 1 (-1).
Табела на третопласираните селекции
БиХ 6 бода
Србија 4
Турција 4
Итачија 4 (-1)
Полска 3
Црна Гора 3 (-1)
Холандија 2 (-1)
Романија 2 (-1)