Претседателот на ВМРО-ДПМНЕ, Христијан Мицкоски денеска учествувал на Самитот на лидери на ЕПП во чиј фокус е Западниот Балкан од кој дел е и Македонија. Во своето онлајн обраќање, лидерот на опозициската партија апелирал до сестринските партии да помогнат во забрзување на првата Меѓувладина конференција, а со тоа и на интеграцијата на Македонија во Европската Унија по мартовската препорака за земјава да ги почне пристапните преговори.
„Aпелирам да помогнете да се забрза процесот на спроведување на првата Меѓувладина конференција што ќе овозможи започнување на пристапни преговори со Европската Унија. Ние, ВМРО-ДПМНЕ сме подготвени да ги поставиме преговорите на брза патека врз основа на најважните стандарди, вредности и принципи на ЕУ“, истакнал Мицкоски.
Лидерот на ВМРО-ДПМНЕ притоа се заблагодарил на хрватскиот премиер Андреј Пленковиќ за поддршката која ја дава за проширување на Унијата, но и на претседателот на ЕПП, Доналд Туск со чија поддршка е организиран овој самит со фокус на нашиот регион. Мицкоски им порачал дека „новата Влада на ВМРО-ДПМНЕ е подготвена да ја стави Република Македонија на брзата трака за членство во ЕУ со фокус на клучните проблеми на државата за кои се потребни суштински решенија“.
„Во оваа смисла разбираме дека мора да ги завршиме домашните задачи. Ова значи справување со корупцијата на високо ниво, воспоставување функционален систем на владеење на правото, одговорност и зајакнување на нашиот политички и судски систем, така што тој ќе биде транспарентен и ќе обезбеди рамка со која се дава правна сигурност. Ова може да се постигне и следната Влада предводена од ВМРО-ДПМНЕ ќе се посвети на овие принципи“, нагласил тој.