Најновата проекција на Меѓунродниот Монетарен Фонд (ММФ) е дека македонската економија годинава ќе има пад од четири проценти, но за следната предвидува раст од седум отсто. Во извештајот објавен вчера, се наведува дека Владата брзо одговорила со целни мерки и со привремена фискална поддршка за амортизирање на социјалниот и економски удар од кризата и за заштита на ликвидноста на компаниите, за зачувување на работните места и помош на невработените и најранливи категории граѓани, додека Народната банка ја намали основната каматна стапка и направи измени во регулативата за да овозможи на комерцијалните банки да го реструктуираат долгот на компаниите и граѓаните.
„Владата останува цврсто посветена на заштита на стабилноста на монетарниот и на финансискиот сектор и презема соодветни мерки што би биле неопходни“, наведуваат од ММФ и додаваат дека Владата изрази силна заложба штом ќе заврши кризата од ковид 19 да спроведе структурна реформска агенда за опоравување од кризата.
.ММФ, како што стои во извештајот, останува подготвен да ја поддржува Северна Македонија во борбата со пандемијата и опоравување на економијата. Се додава дека од ММФ се побарани 176 милиони евра и се оценува дека земјата е во можност и има капцитет да го сервисира долгот. За јавниот долг на државата наведува дека останува одржлив, но оти има зголемени ризици.
Во најновиот извештај на ММФ се предвидува пад на сите економии во регионот. Во Црна Гора и Хрватска од девет отсто, Албанија, БиХ и Косово од пет отсто, Бугарија четири и Србија три отсто.
За 2021 година проекциите за земјите од регионот се дека растот на БДП ќе се движи од 3,5 до осум отсто.
ММФ предвидува највисок раст од 8 отсто во 2021 година да имаат албанската економија, потоа Србија и Косово со 7,5, следи македонската економија со 7 отсто, Црна Гора со 6,5 отсто, Бугарија со 6, Хрватска со 4,9 отсто и Босна и Херцеговина со 3,5 отсто.