Министерството за здравство (МЗ) ја информира јавноста дека досега, со секвенционирање на вирусот SarsCoV2, е детектиран сојот омикрон само кај еден пациент кој пред извесно време се вратил во државата од Велика Британија. Утврдување на присуство на сој на вирусот SarsCov2 се врши единствено и исклучиво со секвенционирање, ПЦР тестирање, односно детектирање на S-gene dropout може да биде само индикација, но не и потврда дека пациент е заразен со сојот омикрон на ковид 19.
„Досега на ПЦР тестови кај тројца пациенти позитивни на ковид 19 е детектиран S-gene dropout, но нема извршено секвенционирање, односно нема потврда дека се заразени со омикрон. Тестирањата се направени во приватна болница, а станува збор за пациенти од Прилеп, од Велес и од Струга. На пациентите им е направена епидемиолошка анкета и, согласно протоколите, лицата со кои биле во контакт се ставени во изолација. Министерството за здравство апелира од воздржување и давање на паушални изјави и непроверени информации кои ги доведуваат граѓаните во заблуда и шират паника меѓу населението“, се наведува во соопштението на МЗ кое следи по веста на епидемилог од Центарот за јавно здравје во Струга дека е регистиран прв случај на омикрон сојот на коронавирус во градот.