На 6 декември треба да се одржи првото рочиште за случајот „Траекторија“ во кој обвинети се лидерот на ВМРО-ДПМНЕ, Никола Груевски и поранешните функционери Владимир Пешевски, Миле Јанакиески и поранешниот директор на Агенцијата за државни патишта, Љупчо Георгиевски.

Во овој случај обвинетите се товарат  затоа што во 2012 и 2013 години при процедурата за избор на изведувач за градење на автопатите Миладиновци – Штип и Кичево – Охрид не ги почитувале правилата за спроведување тендер и дозволиле една компанија незаконски да добие имотна корист. Овие лица, во постапката за барање најдобар изведувач, спротивно на правилата за јавни набавки и спротивно на условите на кинеската влада и кинеската „Ексим банка“, избрале изведувач што имал поскапа понуда од втората компанија што конкурирала на тендерот.

Во јануари 2013 година иако биле доставени две понуди, разгледувале и одлучиле само за една. Понудата на компанијата која доставила пониска понуда, била скриена, по што бил склучен договор само со компанијата која имала повисока понуда. И тука се работи за злоупотреба на службената положба и овластување.

Овој обвинителен акт позитивно го оцени судијката Татјана Михајлова и ги прифатила прислушуваните разговори како доказ.

Одбраната на Пешевски барала прислушуваните разговори да не бидат доказ бидејќи вицепремиерот не разговарал со Груевски, туку за него разговарале други функционери.

За овој случај  закажани се и два дополнителни датума за судење, 18 и 26 декември.