Една народна вели „на маката се познаваат јунаците“ што совршено „легнува“ на македонските ракометари кои попладнево (18.15 ч.) во Виена ќе играат против Австрија во решавачкиот меч за опстанок на Европското првенство. Ситуацијата е јасна – потребна е победа со најмалку два гола разлика над една од трите домашни селекции на турнирот, опција со која „црвено-жолтите“ нема да зависат од резултатот во пресметката меѓу Чешка и Украина. Секој друг исход, како победа со гол разлика или реми, ќе зависи од бројот на постигнати погодоци или, пак, од епилогот од вториот дуел во групата Б во 20.30 часот.
„Пред нас е еден од оние мечеви за кои велиме е „да се бидеме или не“ и одлична прилика да видиме кои сме и до каде сме. Некои детаљи од мечот со Чешка ќе треба да корегираме. Мотиви не недостасуваат, како што е секогаш случај на Европските првенства. На нас преостанува да излеземе на терен, да покажеме што знаеме и да победиме. А, ако го сториме тоа и со два гола разлика, мислам дека ќе пренесеме бодови во наредната фаза што е од исклучително значење“, истакна кружниот напаѓач на Вардар и на репрезентацијата на Македонија, Стојанче Стоилов, кој смета дека нема причина за стравување, а како единствена разлика во корист на Австријците го посочи фактот дека се домаќини на ЕП.
Од првата минута меѓу стативите се очекува Никола Митревски. Голманот на Еурофарм Пелистер имаше одлична партија против Украина во првото коло, но против Чешка предност доби Борко Ристовски кој забележа само три интервенции, па затоа и очекувањата дека селекторот Брестовац ќе реши повторно да почне со Митревски. Тој, пак, денешниот меч го опиша како мало финале за македонската репрезентација.
„Овој меч е како мало финале за нас. Со победа останува на Европското првенство. Победата не е невозможна мисија. Наше е да дадеме максимум на терен и да не дозволиме на австриските крилни играчи да се разиграат и размавнат“, рече Митревски.
Освен во групата Б, денеска ќе бидат познати и двата патника во четвртфиналната фаза од Ф конкуренцијата, а репертоарот носи и дуели во групата Д во која нема никакви дилеми кои ќе репрезентации ќе продоклжат на ЕП. Тоа се Норвешка и Португалија на сметка на Франција и на БиХ.
ЕП 2020 во ракомет (м) – денеска играат
Група Б (Виена)
Австрија – Македонија (18.15 ч.)
Украина – Чешка (20.30 ч.)
Табела: Австрија 4 бода, Чешка 2, Македонија 2, Украина 0.
Група Д (Трондхајм)
БиХ – Франција (18.15 ч.)
Португалија – Норвешка (20.30 ч.)
Табела: Норвешка 4 бода, Португалија 4, Франција 0, БиХ 0.
Група Ф (Гетеборг)
Швајцарија – Словенија (18.15 ч.)
Полска – Шведска (20.30 ч.)
Табела: Словенија 4 бода, Шведска 2, Швајцарија 2, Полска 0.