Врховниот суд на Европската Унија (ЕУ) ѝ наложи на Полска да плаќа казна по еден милион евра дневно поради непридржување на европската пресуда за реформа на правосудството во Варшава, јавуваат светските медиуми.

Според соопштението на Европскиот суд на правдата, причина за таквиот потег е досегашното одбивање на земјата да ги спроведе одлуките на највисоките судски инстанци за контроверзните реформи во правосудството.

Конкретно, станува збор за за налог за запирање на работата на спорното дисциплинско тело за санкционирање на судии. Според пресудите на Европскиот суд на правдата, таквата активност не е компатибилна со правилата на ЕУ за независност и непристрасност на судството, пишува „Зидојче цајтунг“.

Судот соопшти дека казната е неопходна „за да се избегне сериозна и непоправлива штета по правниот поредок на Европската Унија и вредностите на кои почива таа Унија, посебно на владеење на правото“.

Финансиските санкции за Полска се побарани на 9 септември од комисијата при ЕУ што е одговорна за следење на владеење на правото во ЕУ. Санкциите ќе траат сè додека Полска не ги исполни налозите на Европскиот суд на правдата.