Монпелје испречен пред Вардар на патот кон ново финале што ќе значи и прилика за одбрана на титулата во ракометната Лига на шампиони (ЛШ). Мечот меѓу македонскиот и европски првак и предизвикувачот од Франција е попладнево (18 ч.) во „Ланксес арена“ во Келн во која, пак, од 15.15 часот ќе се пресметаат ПСЖ (лански финалист) и дебитантот на завршните турнири, Нант на Кире Лазаров.
„Шампиони сме и имаме обврска да ја браниме титулата. Нашиот фокус е насочен само на работите што се случуваат на терен. На финалните турнири нема фаворити. Задоволство е да се биде дел од нив, па затоа треба да уживаме како што беше случај и лани. Не размислуваме за финале, сега размислуваме само на Монпелје и на ништо друго“, истакна Раул Гонзалез.
Шпанецот на клупата на Вардар и на македонската репрезентација посакува успех како на неговиот сонародник Мартин Амброш кој со женската екипа на Ѓер на 13 мај ја одбрани титулата во ЛШ пред трансфер во Ростов на Дон од наредната сезона. Гонзалез, пак, по оваа го презема кормилото на ПСЖ каде сака да замине како титулар.
„Присутен е притисок, голем е меѓутоа ние сме подготвени и физички и психолошки да се соочиме со предизвикот и веруваме дека повторно можеме докрај. Минавме период на макотрпна работа по што дојдовме овде да бидеме најдобри. Фокусот е на екипата на Монпелје која е одлична, игра брз ракомет, имаат страшно добра транзиција и опасни се „еден на еден“. Клучна за успех, сепак, ќе биде нашата игра во одбрана“, нагласува Хрватот во „црвено-црниот дрес, Лука Циндриќ.
Вардарци лани ја освоија шампионската титула по триумфот над ПСЖ со 24:23 во големото финале на Фајналфор турнирот во Келн. Оваа година се разминаа со париските „светци“ во полуфиналето, но затоа е можна реприза на минатогодишниот дуел за престижниот трофеј како што беше случај со женското издание на Лигата на шампиони во Будимпешта.
Лига на шампиони (м) – Келн 2018
Полуфинале
ПСЖ – Нант (денеска, 15.15 ч.)
Вардар – Монпелје (денеска, 18 ч.)
Недела
Меч за трето место (15.15 ч.)
Финале (18 ч.)