По СДСМ, уште неколку партии најавија дека поради неисполнувањето на демократските предуслови, нема да учествуваат на изборите закажани на 5.јуни.
Меѓу нив засега Демократскиот сојуз, Левица, ДОМ и Достоинство најавија дека нема да ги легитимираат изборите на кои инсистираат ВМРО-ДПМНЕ и ДУИ.
Од партијата на Гзим Острени, Унитети, исто така потенцираат дека не се исполнети условите.
– По одлуката на парламентарното мнозинство за распуштање на Собранието и за одржување на парламентарни избори на 5-ти јуни без да бидат реализирани клучните прашања на Договорот од Пржино: исчистен Избирачки список, реформи во медиумите и подeлба на партијата од државата, партијата УНИТЕТИ јасно изјавува дека нема да учествува на такви избори со што би легитимирала украдени избори од страна на партиите на власт. Овој став партијата го донесе и на Првиот свој Конгрес.
УНИТЕТИ ќе инсистира да со помош на меѓународниот фактор како и на секој домашен субјект кој има за цел враќање на демократијата во нашата земја, да се создадат потребни услови за одржување на избори во кои гласачкото право на граѓанинот е неповредливо и правосилно, се вели во соопштението на партијата.
Од друга страна, движењето БЕСА вели засега нема услови за фер, слободни и демократски избори, но дека сепак конечната одлука дали ќе учествуваат на изборите на 5.јуни, ќе биде донесена по Централниот совет на движењето.
Според претседателот на БЕСА, се поизвесно е дека тие нема да учествуваат во избори во кои се легитимира манипулацијата при што повторно, вели, ќе се изберат криминалци и повторно ќе се прегази демократската волја на граѓаните на Македонија.
И Национална Демократска Преродба нема да учествува на изборите на 5.јуни се додека не се најде решеније за нормално функционирање на државата.
– НДП во континуитет има изјавено дека изборите во ниту еден момент не може да доведат до решенија, без разлика што режимот на ВМРО-ДУИ, и на други аналисти, мислаат дека изборите се решеније. Ставот дека изборите не нудаат решеније се аргументира со фактот дека само во последната деценија се организираа еден куп предверемени избори, но до ден денес граѓаните на оваа земја не видоа решенија за државата, смета НДП.
Национална Демократска Преродба потенцира дека земјата има потреба од ургентни решенија за круциалните проблеми имајќи во предвид дека во земјата постои вистински хаос во прочистувањето на изборната листа, реформите во медиумите, како и тотално запоставување на извештајот на Прибе.
– Ако на ова и додадеме дека институциите во земјата се пред целосно уништување од невиден недостаток на владеењето на правото, тогаш едностраните избори на 5-ти јуни ќе бидат само погребување на демократијата, реагира НДП.