Македонската фудбалска репрезентација го одигра најслабиот натпревар во изминатите две години и го запиша вториот пораз во квалификациите за Европското првенство во 2020 година. По Полска, бодови од Скопје однесе и Австрија која вечерва славеше со 4:1 во четвртото коло во групата Г. Двапати на арената „Тоше Проески“ реализира Марко Арнаутовиќ во 62. минута од пенал и во 82. минута, Валентино Лазаро погоди во 39. минута и во 86. минута во противничката мрежа „стрелаше“ и Конрад Лајмер со голема помош од Егзон Бејтулаи. Единствениот за „црвено-жолтите“ беше автогол на Мартин Хинтерегер во 18. минута.
Македонија со грч влезе во четвртиот настап во евроквалификациите. Во најголем дел од првото полувреме, Австрија беше селекцијата што повеќе пати го побара патот до мрежата на Столе Димитриевски кој, пак, беше на ниво и не дозволи да биде совладан во двете зицер ситуации со Марко Арнаутовиќ во втората и во 24. минута, двапати се обиде и Марсел Сабицер кој во 44. минута го погоди и десниот дирек, а во 26. минута се закани и Андреас Улмер чиј пласиран удар, за среќа, заврши во голаут.
Таквата слика на теренот, сепак, резултатски не се одрази на „црвено-жолтите“ кои на одмор заминаа со 1:1. Македонската репрезентација поведе со автоголот на Мартин Хинтерегер во 18. минута, израмнувачкиот стигна во 39. минута преку Валентино Лазаро. Капитенот Горан Пандев имаше прилика во 30. минута да се запише во листата на стрелци, но шутираше над голот од непосредна близина.
Домашните не излегоа од грч ниту во продолжение на средбата. Многу грешни додавања на средина и во нападот, премногу простор по страничните позиции направија играта, во најголем дел, да се одвива пред голот на Димитриевски кој не дозволи да биде совладан во 50. минута од Сабицер, фудбалер кој во 62. минута изнуди пенал што во гол го претвори Арнаутовиќ. Австрискиот напаѓач ја погоди целта и 20 минути подоцна по асистенција на Сабицер за Лајмер да стави точка на трите бода во 86. минута.
Квалификациите за македонскиот национален тим продолжуваат на 5 септември со гостување во Израел, а потоа, во шестото коло, и кај Летонија.
Полска ја оправда фаворитската улога против Израел и забележа нов триумф без примен гол (3:0) додека Словенија беше уште поубедлива во Рига каде ја декласира Летонија со 5:0.
Квалификации за ЕП 2020
Група Г, 4 коло
Македонија – Австрија 1:4
Полска – Израел 3:0
Летонија – Словенија 0:5
Табела: Полска 12, Израел 7, Австрија 6, Словенија 5, Македонија 4, Летонија 0.
Идно коло (5 септември)
Израел – Македонија
Словенија – Полска
Австрија – Летонија