„Њујорк тајмс“ објави дека највисоки претставници на ЦИА минатата недела пратиле тајна порака до сите нејзини бази и агенции во светот во која ги предупредуваат оти губат премногу агенти што ги регрутираат по другите држави.
Нив или ги апсат или едноставно ги убиваат. Во текстот за таквата состојба се истакнува дека станува збор за навистина невообичаена порака на централата на ЦИА во која стои оти се прегледани десетици случаи во последните години што вклучуваат соработници во странски земји кои ги загубиле животите, се приведени или разоткриени.
Во кратката порака дури е наведен и точниот број на ликвидирани соработници, што е строго чуван детал кој никогаш не се споделува во таквите пораки. „Њујорк тајмс“ не го наведува точниот број на загубени соработници, но објави дека ЦИА не сакала да ја коментира пораката. Се наведува и дека агенцијата се соочува со исклучителни потешкотии при регрутацијата на соработници, поготово во земји како Русија, Кина, Иран и Пакистан во кои ривалските служби упорно „ловат“ соработници и службеници на ЦИА и често ги претвораат во двојни агенти.
Во анализата на њујоршкиот весник се истакнува дека пораката е доказ за лошото работење на централната американска шпионска служба, дека во неа премногу се верува на извори, се потценуваат ривалските странски служби, пребрзо се регрутираат соработници не обрнувајќи притоа внимание на контраразузнавачките ризици, односно дека на важноста на мисијата се дава преголема предност во однос на прашањето на сигурноста.
Големиот број на компромитирани соработници е, исто така, доказ за зголемената способност на другите земји да ги искористат предностите од иновациите во контраразузнавањето, како биометриски скенирања, препознавање на лица, вештачка интелигенција и хакерски алатки за следење на агентите на ЦИА и откривање на нивните извори. Забележано е дека не е толку проблем да се соберат доволно податоци за аналитичарите со седиште во Ленгли, но создавањето мрежа на соработници во светот е она во што ЦИА отсекогаш била најдобра и зошто нејзините теренски агенти редовно напредувале во службата.
И тука се чини и настана проблемот, бидејќи притоа се заборави како треба да се провери кој е новиот соработник или дали можеби има контакти со која било ривалска служба. Исто така, ЦИА во последните 20 години ги фокусираше своите напори за борба против терористичките закани што доаѓаат од Авганистан, Ирак и Сирија, додека службите на ривалските сили како Кина или Русија напорно работеа на методи и системи за откривање, што ЦИА сега скапо го плаќа и ќе мора да се поправи во тој домен.