Американскиот милијардер и поранешен градоначалник на Њујорк, Мајкл Блумберг (77) најверојатно ќе влезе во трката за кандидат на демократите на претседателските избори во САД. Официјална потврда засега нема, но сигнал за тоа е апликацијата што ја поднел во неговата изборна единица во Алабама.
Неговиот портпарол Џејсон Шечер изјави дека номинацијата ќе биде официјализирана во текот на наредната недела.
„Њујорк Пост“ вчера објави дека познатиот американски бизнисмен, политичар, писател и филантроп Мајкл Блумберг размислува повторно да се вклучи во претседателската трка во 2020 година, разочаран од сите големи кандидати на Демократската партија.
„Блумберг смета дека Џо Бајден е слаб, а Берни Сандерс и Елизабет Ворен не можат да победат“, нагласил извор запознаен со промената на мислењето на поранешниот градоначалник на Њујорк во три мандати, кој пред неколку месеци изрази незаинтересираност да биде кандидат.
Демократите ќе го избираат својот кандидат за претседателските избори на 3 февруари.