СДСМ и Либерална партија на Ивон Величковски и денеска се пожалија дека Кривичниот суд не сака да им издава потврди за неосудуваност на кандидатите за пратеници.
Петре Шилегов носител на листата на шестата изборна единица денеска на прес конференција обвини дека ВМРО-ДПМНЕ преку претседателот на Кривичниот суд Владимир Панчевски се обидува го сруши изборниот процес.
„ВМРО- ДПМНЕ и Никола Груевски се сериозно исплашени од историските листи на СДСМ. Тие преку нивниот послушник Владимир Панчевски го опструираат изборниот процес. Согласно Изборниот законик, кандидатите за пратеници до Државната изборна комисија треба да поднесат Уверение од кривичната евиденција дека не се правосилно осудени на казна затвор од најмалку 6 месеци. Кандидатите од листите на СДСМ кои денес поднесоа барања подигнување на Уверенијата им е закажано на 15 ноември 2016 година, а рокот за поднесување на кандидатските листи е до 11 ноември 2016 година. Ваквото однесување на Панчевски, е класичен пример за злоупотреба на службената положба и води кон рушење на Изборниот процес“, рече Шилегов.
Тој вели дека искуството од претходните избори покажува дека овие потврди се издаваат во истиот ден на поднесувањето, и тоа во рок од еден час
За овој проблем, СДСМ денеска ги известило и Државната изборна комисија и Претседателот на Врховниот суд на Република Македонија, а писмо испратиле и до Панчевски.
Слична реакција денеска имаа и од Либералната партија. Партијата испратила известување до ДИК во кое се вели дека наишле на проблем во издавањето на потврдите за неосудуваност на кандидатите за пратеници од нивната партија.
„При доставата на документите, усно сме известени дека надлежниот суд веројатно нема да биде во можност да ги издаде потребните документи во следните седум дена.
Предупредуваме дека со тоа државата ќе спречи регистрирана политичка партија, да поднесе кандидатски листи за претстојните парламентарни избори. Нема да дозволиме државата узурпирана од четири партии да не спречи во правото на политичко дејствување и остварување на законските права“, пишува во соопштението на партијата.
На ова од Кривичниот суд велат дека „одредени поединци, кандидати на листи за претстојните парламентарни избори се обидуваат да го заобиколат законот со најразлични ургенции и повторно преку медиумите да извршат притисок и да ја сокријат својата неажурност“.
„Судот, како и секогаш, постапува по дадените законски рокови, а во пресрет на барањата на граѓаните, редовно и без никакви одолговлекувања ги издава бараните уверенија. Вообичаеното време за кое судот во рамки на своите можности издавало уверенија било три работни дена, но поради зголемениот обем на поднесени барања во моментов даден е рок од пет до седум дена. Почитувајќи ги законските рокови и целта за која се вадат уверенијата, сите реакции во врска со нашето соопштение не треба да бидат насочени кон судот, туку барателите вината да ја побараат во ненавременото доставување на барањата за издавање на потврда за Кривична и Казнена евиденција. Судот не може да биде одговорен за личната неажурност на барателите зошто до последен момент да не поднесуваат барања и судот да биде виновникот “, пишува во соопштението на судот.