Повик до лидерите на СДСМ, Зоран Заев и на ВМРО-ДПМНЕ, Христијан Мицкоски да седнат уште денеска и да се договорат околу датумот за одржување на предвремените парламентарни избори упати претседателот Стево Пендаровски во своето пладневно обраќање до нацијата. Државните интереси, нагласи Пендаровски, мора да бидат над личните и над партиските. Во спротивно, нагласи македонскиот претседател, се заканува продлабочување на кризата.

„Државните интереси мора да бидат над личните и над партиските. Јас сум подготвен уште денеска да седнеме и да разговараме за начините за излез од кризата. Веднаш по завршување на ова мое обраќање, ќе остварам телефонски контакт со двајцата лидери. Знам дека поголемиот број од нашите граѓани не размислуваат за избори. Но, избори и во време на коронавирусот се неопходни за да добиеме функционален парламент и легитимна политичка влада наместо техничка“, потенцира Пендаровски.

Тој истакна дека во изминатите денови остварил имал комуникација со лидерите на партиите и со меѓународната заедница. Заклучокот, вели македонскиот претседател, е дека и власта и опозицијата се согласни дека на изборите мора да има набљудувачи од ОБСЕ/ОДИХР и дека ДИК во соработка со Комисијата за заразни болести треба да изготват безбедносни протоколи за гласање. Но, за жал, рече Пендаровски, тоа не е случај и со датумот за избори за кој двете страни се разликуваат од осум до 15 дена.

Претседателот на државата притоа ја нагласи потребата од инклузивност на изборниот процес, оти спротивното ќе значи влез во политичка криза, а ако се земат во предвид и хибридните закани тоа понатаму би можело да прерасне и во безбедносна криза.

„Време за губење немаме“, порача Пендаровски.

Евентуален состанок денеска не би бил во формат каков што имаа последните две лидерски средби од причина што, според Пендаровски, е познат ставот на останатите лидери на политичките партии во врска со датумот за избори.

„Ако сакате и поименично ќе кажам, но еве ќе кажам дека сите останати се за избори на 5 или на 19 јули“. рече Пендаровски.

Во случај да не падне договор за датумот на избори до утре на полноќ кога истекува четвртата одлука за вонредна состојба, претседателот Пендаровски спомена сценарио и во понеделник, на пример, да прогласи вонредна состојба за неколку дена доколку лидерите договорат датум што би бил по 5 јули.

Пендаровски во обраќањето истакна дека нема да прогласи нова вонредна состојба по досегашните четири од кои две беа во времетрање од 30 дена и две за период од 14 дена.