Заедничкиот кандидат за претседател Стево Пендаровски имаше кратко обраќање пред членовите на Централниот совет (ЦО) на Демократската Унија за Интеграција (ДУИ) кои меѓудругото расправаат за потврдата на неговата кандидатура на претстојните претседателски избори. Пред присутните посочи дека се обраќа на покана на раководството на партијата во Мала Речица во пресрет на нивната формална одлука за поддршка бидејќи договорот на 31 политички субјект што застана зад него мора да мине низ процедури во секоја од партиите.
„Повеќе партии викендот имаат состаноци. Доаѓам од конгресот на СДСМ во Скопје каде што исто така формално треба да се потврди мојата кандидатура бидејќи без тоа не може да се продолжи со процедурата во Државната изборна комисија. Затоа и мојата посета на ДУИ и на неколку помали политички партии. Мојот концепт останува Македонија за сите, во која ќе нема граѓани од втор и трет ред и ќе нема потстанари и газди, односно, сите треба да бидат еднакви без разлика на етничка заедница, религија или политичка партија. Во тој концепт верувам и се залагав и пред да знам дека ќе бидам кандидат за било која функција“, рече Пендаровски.
Во однос на изборите и очекувањата од нив, Пендаровски рече дека не е важно кој ќе победи, туку е важно, во пресрет на одлуката на Европскиот совет во јуни, Македонија да покаже дека е способна и има капацитет да спроведе кристално чисти избори. За тоа истакна дека е потребен ангажман од сите почнувајќи од институциите, граѓаните и најмногу политичките лидери без оглед дали доаѓаат од власта или опозицијата бидејќи, како што посочи, најважно е Македонија да победи, да спроведе беспрекорни избори со кои ќе покажеме не само на опозицијата, туку и на Брисел дека неслучајно сме добиле покана за НАТО и оти за некој месец ќе станеме полноправна членка, туку дека и со полно право очекуваме во јуни да добиеме покана за членство во ЕУ, додаде Пендаровски.