Потпретседателите на ДУИ, Теута Арифи, Изет Меџити и Невзат Бејта, денеска се сретнаа со претставници од СДСМ, односно од работна група составена од Радмила Шекеринска, Рената Дескоска и Оливер Спасовски. Состанокот се одржа во Холидеј ин.
Првата ваква средба доаѓа откако претседателот Иванов побара од Социјалдемократите да соберат 61 потпис како доказ дека имаат мнозинство за формирање влада, за потоа да им го додели мандатот.
Шеќеринска изјави дека целта е формирање на стабилна Влада:
„Ова е прва средба и ваквите средби со потенцијалните коалициони партнери ќе продолжат откако ќе завршат дискусиите внатре во партиите. Целта е заедничка на двете партии, откако претседателот Иванов реши да не го додели мандатот на втората по ред партија, а тоа е Македонија да добие стабилна влада која ќе работи на реформите за подобрување на животот во земјава и за решавање на уставната криза. Ова беше кратка средба и се друго што би кажала би импровизирала така да денеска разговаравме за принципиелни точки“, рече Шекеринска, дополнувајќи дека за сите прашања на маса, јавноста ќе биде известена.
Теута Арифи, една од потпретседателите на ДУИ, изјави дека имале конструктивни разговори помеѓу работните групи.
„На маса ги ставивме истите барања како и претходно. Конечната одлука ја носи претседателот“, изјави Арифи.
По изборите на 11.декември, во законски предвидениот рок ВМРО-ДПМНЕ и ДУИ не успеаја да се договорат за формирање на мнозинство, откако Иванов му го предаде мандатот на екс-премиерот Никола Груевски како лидер на партијата со најмногу освоени мандати.
Лидерот на СДСМ, Зоран Заев на прес-конференција порача дека го очекува мандатот по што следуваше и средба, на која Иванов го известил дека за да не го крши Уставот, бара доказ со 61 пратеник.