Не е ништо ново ако се каже дека последните неколку години Русија е поприсутна на Балканот со свои разни дипломатски претставници од најразлични профили.
Таков е и Николај Патрушев, човек на Кремљ кој својата кариера ја гради како разузнавач, а важи за близок човек на претседателот на Русија Владимир, Путин.
Како што пишува во својата анализа медиумот „Политико“, Патрушев е на чело на рускиот Совет за безбедност, а познат е по своите националистички убедувања и широкото разузнавачко искуство.
Според „Политико“, иако надворешната политика јавно му е оставена на Сергеј Лавров, сепак одлуките ги носи мал тим од разузнавачи и воени лица кои се во тесна врска со Путин.
„Русија постојано се трансформира во организација каде индивидуалци имаат задачи и одговорности кои некогаш и можеби не ги заслужуваат“, вели Марк Гаљоти, експерт за службите на Русија и истражувач во Институтот за меѓународни односи во Прага. „Патрушев дефинитивно е еден од таквите кои мислат дека Русија е во егзистенцијална борба“.
Николај Патрушев влегува во КГБ во 1974 година а во 1990 година се сретнал со Путин. По 10 години во руската служба преминува во Советот за безбедност и има големо влијание. Сепак јавноста не знае многу за него бидејќи претежно работи во сенка.
Написот за Патрушев на „Политико“ доаѓа во време кога Русија применува поинаква стратегија на Балканот и во време кога е во “заладени односи“ со Западот.
На Русија не и се допаѓа тоа што Црна Гора неодамна влезе во НАТО, откако Москва беше обвинета дека ја попречувала земјата во своите напори за влез во Алијансата.
Според наводите, Патрушев по влезот на Црна Гора во НАТО, веднаш остварил средби со највисоките претставници на Србија. Иако според официјалните изјави, посетата на Белград од страна на Патрушев била протоколарна, неговата позиција постојано расте.
Тој подоцна се сретнал со српскиот министер за внатрешни работи, Небојша Стефановиќ, а експертот Гаљоти тврди дека негова најнова задача е Балканот.
„Последнава година јасно е дека задачата на Патрушев е Балканот. Тоа говори за тоа колку е важен Балканот или колку важен ќе стане“, вели аналитичарот.
Во својата анализа „Политико“ не ги изостава документите објавени од OCCRP и НОВА кои сугерираа дека руски дипломати се вмешани и во Македонија за да го зајакнат рускиот наратив во Скопје.
Според Јелена Гускова, професор во Москва, Србија е стратегиски најважна за Русија, и Москва ќе преземе сериозни мерки доколку НАТО одлучи да се проширува на Балканот, бидејќи според Патрушев, НАТО се обидува да ги интегрира Македонија и Босна и Херцеговина по Црна Гора.