Европската унија ја поздрави денеска одлуката на севернокорејскиот лидер Ким Џонг-ун за прекин на нуклеарните проби и тестирања на балистички ракети од страна на Пјонгјанг.
– Неговата изјава, која е, исто така, поздравена од Вашингтон и Пекинг, го изразува стремежот на Пјонгјанг да ги почитува меѓународните обврски, односно да ги исполнува резолуциите на Советот за безбедност на ОН, се наведува во соопштението на Високата претставничка на ЕУ за надворешна политика и безбедност, Федерика Могерини.
Таа изрази надеж дека претстојните средби меѓу лидерите на САД, Северна Кореја и Јужна Кореја ќе доведат до „конкретни резултати“.
Велика Британија, исто така, смета дека плановите на Северна Кореја да ги запре нуклеарните проби претставува позитивен чекор. Во соопштението на британската Влада се наведува дека тоа е израз на добра волја.
– Продолжуваме ангажирано да работиме со нашите меѓународни партнери за целосно решавање на проблемот по мирен пат, што подразбира контрола и прекин на нуклеарната програма на Корејскиот Полуостров, се додава во соопштението на британската Влада.
Германија одлкуката на Пјонгјанг ја оцени како чекор во вистински правец, но Северна Кореја мора да ја разоткрие својата нуклеарна и ракетна програма, посочи германскиот министре за надворешни работи, Хајко Мас.
– За да влеземе во сериозен политички процес за целосна денуклеаризација на Северна Кореја, сепак е неопходно Пјонгјанг да следи специфични чекори и целосно да ја разоткрие својата нуклеарна програма, но на проверлив начин, истакна Мас.
Тој додаде дека тоа барање е „согласно очекувањата на меѓународната заедница“.
Северна Кореја денеска соопшти денеска дека прекинува со тестирањето на балистички ракети со голем дострел и планира да ги затвори полигоните за нуклеарни проби.
Пјонгјанг се одлучи на таков потег со цел одржување на „националниот фокус“ и подобрување на економијата.
Претседателот на САД, Доналд Трамп реагираше веднаш на „Твитер“ и напиша дека „ова е многу добра вест за Северна Кореја и за светот – голем напредок“.
„Со радост го очекувам самитот“, напиша Трамп на „Твитер“.
За одлуката на Северна Кореја се огласи и Москва.
Шефот на Меѓународниот комитет на Советот на Руската Федерација, Константин Косачов во порака објавена на Фејсбук, оцени дека одлуката на Северна Кореја не е доволна за да се нормализира ситуацијата на Корејскиот полуостров, туку се неопходни „оперативни, по можност демонстративни возвратни мерки” на САД.
– Прекин на агресивната и деструктивната реторика. Признавање на суверените права на Северна Кореја за сопствен развој. Престанување со заканите за промена на власта во таа земја преку надворешено мешање. Прекин на воените активности кај границата на Северна Кореја. Покренување на политички дијалог, наведе Косачов, кој изрази надеж дека меѓукорејскиот самит и самитот на Северна Кореја-САД „сигурно ќе се одржат”.
Кинеското Министерство за надворешни работи го поздрави потегот на Северна Кореја да прекине со нуклеарните и ракетни проби што ќе помогне, според нив, за намалување на тензиите на Корејскиот полуостров и унапредување на денуклеаризацијата.
Јапонскиот министер за надворешни работи Ицунори Онодера изјави дека не е време да се попушти со притисокот врз Пјонгјанг.