Демократскиот кандидат Џо Бајден води пред сегашниот американски претседател Доналд Трамп за осум процентни поени кај регистрираните гласачи, а поранешниот потпретседател на САД се чини дека има значителна предност и кај неопределените гласачи, покажа анкета спроведена од „Ипсос“. Според анкетата спроведена од 15 до 21 јули, 45 отсто од гласачите рекле дека би гласале за Бајден на изборите на 3 ноември, додека 38 проценти го поддржуваат Трамп.
Другите 16 проценти се неопределени гласачи или оние кои планираат да поддржат трет кандидат, или можеби воопшти нема да гласаат.
Анкетата исто така покажува дека 61 отсто од неопределените гласачи или оние кои се залагаат за некој трет, доколку би морале да избираат меѓу двајцата кандидати, би гласале за Бајден, додека 39 отсто во тој случај би гласале за Трамп. Меѓу неопределените гласачи, 70 отсто сметаат дека земјата е на погрешен пат, а 62 отсто дека и економијата оди во погрешна насока.
Таа група избирачи е, исто така, длабоко вознемирена од развојот на ситуацијата со новиот коронавирус од кој починаа повеќе од 144.000 Американци. Дури 80 отсто од гласачите рекоа дека се загрижени поради ширењето на Ковид-19, а 34 отсто рекле дека би гласале за кандидат кој ќе понуди „стабилен план за обновување на земјата“.
Останатите 24 отсто се изјасниле дека ќе гласаат за кандидат кој може „да ја врати довербата во американската Влада“, а 12 отсто сакаат кандидат кој ќе стави акцент на здравствената заштита. Само 38 отсто од гласачите веруваат дека претседателот Трамп добро се справува со кризата со коронавирусот.
Анкетата била спроведена меѓу 4.430 возрасни Американци, вклучувајќи 3.744 регистрирани гласачи и 595 регистрирани гласачи кои не поддржуваат ниту еден од двајцата водечки кандидати.