СДСМ до Државната изборна комисија поднела вкупно 8 приговори. Пет од приговорите се поднесени за избирачки места во Теарце, а три за избирачки места во Тетово, двете се наоѓаат во изборна единица 6 во која носител на листа од опозицијата беше Петре Шилегов, а од ВМРО-ДПМНЕ е Влатко Ѓорчев.
Како што дознаваме приговорите поднесени за гласачките места во Теарце се поднесени поради неусогласеност на гласачките ливчиња. На некои избирачки места во кутијата имало помалку ливчиња од бројот што е наведен на кочанот, а на други пак во гласачката кутија имало вишок ливчиња.
Според членот 151 став 3 од Изборниот законик, на места во кои има несогласување на бројот на ливчиња, треба да се прегласа.
„Државната изборна комисија со решение ќе го повтори гласањето на гласачките места во случаите од ставот (1) на овој член каде што гласањето е поништено само ако вкупниот број на запишани избирачи на тие избирачки места на ниво на изборна единица, град, односно општина влијае врз вкупните резултати.“, пишува во Изборниот законик.
Во шестката ВМРО-ДПМНЕ го води СДСМ за само 307 гласа. Според податоците на веб сајтот на Државната изборна комисија, ВМРО-ДПМНЕ освоила 26.135 гласови, додека СДСМ има 25.828 гласа.
Приговорите поднесени за Тетово, се однесуваат за агитирање на гласачи на самиот изборен ден. За ова има и лица кои се сведоци на целата ситуација.
Приговори до ДИК поднесоа и од БЕСА за изборната единица 2.
Комисијата за сите приговори треба да расправа на јавна седница и да донесе одлука во рок од 48 часа од поднесувањето на приговорите. Ако членовите на ДИК ги отфрлат приговорите на политичките партии, тие имаат рок од 24 часа да поднесат тужба до Управниот суд, од каде пак имаат рок од 48 часа да донесат одлука.