Рускиот претседател Владимир Путин посочи дека е отворен за можноста за директни разговори со Украина.Тој денеска за руската државна телевизија изјави дека има „позитивен став кон сите мировни иницијативи“ и дека се надева дека Кијив „ќе се чувствува на ист начин“.
Москва и Кијив не одржаа билатерални разговори од непосредно по руската инвазија во февруари 2022 година, но САД го зголемуваат притисокот врз нив да се согласат на примирје.
Портпаролот на Кремљ, Дмитриј Песков, изјави дека коментарите на Путин, по истекот на 30-часовното велигденско примирје, за кое секоја страна ја обвини другата за кршење, значат дека тој е отворен за директни разговори.
„Кога претседателот рече дека е можно да се разговара за прашањето за ненапаѓање цивилни цели, вклучително и билатерално, претседателот ги имаше на ум преговорите и разговорите со украинската страна“, рече Песков, цитиран од руските медиуми.
Иако украинскиот претседател Володимир Зеленски не одговори директно на предлогот на Путин, во неговото синоќешно видео обраќање тој јасно стави до знаење дека Кијив е „подготвен за каква било дискусија“ за прекин на огнот што ќе ги запре нападите врз цивили.
Зеленски во неделата предложи продолжување на примирјето, кое „ќе ги запре сите напади со беспилотни летала и ракети со долг дострел врз цивилната инфраструктура во период од најмалку 30 дена“.
Путин рече дека Русија „ќе анализира сè и ќе донесе соодветни одлуки“, но праша како тоа ќе функционира, обвинувајќи го Киев дека користи цивилни згради како ресторани и универзитети за воени цели.
Зеленски вчера дополнително го повика Путин, изјавувајќи дека Украина стои зад понудата – „барем да не се напаѓа цивилната инфраструктура“ – и дека очекува „јасен одговор“ од Москва.
Можноста за директни разговори доаѓа откако американскиот претседател Доналд Трамп се закани дека ќе ги напушти напорите за постигнување прекин на огнот доколку не се постигне напредок. Истовремено, тој вчера продолжи да изразува надеж дека договорот е блиску и може да се постигне дури оваа недела.
Преговарачите од САД, Украина, Велика Британија и Франција ќе се сретнат утре во Лондон на уште една рунда разговори за завршување на војната, рече Зеленски. Овие разговори се продолжение на сличната средба во Париз од минатата недела.