Францускиот претседател Емануел Макрон е домаќин на германската канцеларка Ангела Меркел во Париз. Двајцата државници ќе имаат работна вечера во пресрет на круцијалната недела на преговори за Брегзит меѓу Европската унија и Велика Британија, а, според најавите, меѓудругото, ќе биде отворена и темата за турските воени операции во североисточна Сирија.
Меркел пред малку пристигна во Елисејската Палата на средба со Макрон што е од значење и за Северна Македонија. Извори во дипломатските кругови во Брисел деновиве ја окарактеризираа и како последна шанса на германската канцеларка за омекнување на ставот на официјален Париз и усогласување на ставовите за добивање на датум за почетокот на пристапните преговори за нашата земја и Албанија со ЕУ.
„Се надеваме дека Париз уште еднаш ќе размисли за својата позиција и дека нема да дозволи да биде изолиран во Европа од внатрешно-политички причини“, вели дипломат во Брисел за германската агенција ДПА.
Оценка е дека оној што сега ќе го блокира пристапниот процес ќе биде одговорен за можната дестабилизација на регионот.
Германската Влада смета дека Северна Македонија и Албанија ги исполниле сите услови што од нив ги побарала Европската Комисија. Германската агеција ДПА нагласува дека блокадата ќе биде особено горчлива за Северна Македонија, која се согласи на промена на името за да го откочи процесот на интегрирање во Унијата. Германија не е единствена што не се согласува со францускиот потег, пишува ДПА и додава дека таквиот став го споделуваат и многу други земји-членки на ЕУ.
Франција, пак, сака да поднесе предлог за нова методологија во пристапните преговори за членство во ЕУ на министерскиот состанок во Луксембург, со што би можело третпат да се одложи одлуката за датум за отворање преговори со Северна Македонија и со Албанија. Поголем дел од земјите во ЕУ се изјаснија позитивно за почеток на преговорите со Северна Македонија и Албанија.
За утре е свикан нов состанок на COREPER, како обид за постигнување на консензус пред министерскиот Совет за општи работи кој треба да заседава во вторник, на 15-ти октомври во Луксембург.