Албанскиот премиер Еди Рама на вонредна владина седница најави отпочнување со работа на стручните тимови за проценка на штетите од земјотресот денеска и дека досега се донирани пет милиони евра и над еден милион американски долари. Шаторите што се поставени во Туман и Лач ќе бидат отстранети и како што порача тој, семејствата ќе бидат сместени во хотели. Дел, пак, од жителите на околните села, сепак, сакаат да останат во шатори за, како што рече Рама, да може да се грижат за нивните земјоделски стопанства.
Рама потврди дека досега загинале 49 лица, вклучително и деца, од кои 25 во Драч, 23 во Туман и едно лице во Курбин. Потрагата по преживеани вчера беше прекината во Тумана, а потоа и во Драч.
„Во областа Драч се сместени 1.260 лица, од кои 625 во хотели и 360 во училишни спортски сали. Останатите се наоѓаат во шатори или кај роднини. Во Туман, околу 500 луѓе се сместени во шатори и тие денеска ќе бидат преместени во хотели“, најавио Рама.
Според него, 3.480 луѓе се без дом во округот Тирана во кој 15 згради се целосно уништени, 239 се оштетени и осум се надвор од употреба. Во Драч се регистрирани 701 оштетен објект, од кои 12 се целосно уништени, а 176 се оштетени.
Рама повтори дека секој кој има некаков канал за комуникација и истиот го употребувал за ширење на лажни вести или паника меѓу народот ќе биде затворен. Владата прогласи вонредна состојба и во градот Лач кој, исто така, беше тешко погоден во силниот земјотрес од 26 ноември.