Албанскиот премиер Еди Рама изјави оти во моментот не е загрижен за ситуацијата на Западен Балкан, бидејќи смета дека работите не се дојдени до таа точка, но нагласува дека сите политички фактори во регионот, но и надвор од него во ЕУ мора да бидат внимателни.
Во интервју за печатеното издание на грчкиот весник „Неа“ рече дека не треба да се потценат „симптомите од тој тип“.
Запрашан колку далеку се отиде со иницијативата „Отворен Балкан“ и дали на неодамнешните состаноци во Белград со српскиот претседател Александар Вучиќ и со македонскиот вицепремиер Никола Димитров се разговарало за ситуацијата во регионот, Рама одговори дека иницијативата напреднала, меѓутоа не толку колку што би сакале.
На наредниот состанок во декември во Тирана, ќе минеме на некои цели што се однесуваат на слободата на движење на производите. Што се однесува до ситуацијата на Западен Балкан, сме навикнале на такви ситуации, тоа не е ништо посебно, вели Рама.
На прашање дали е загрижен за мешање на други сили и на Турција во регионот кои се обидуваат да го оддалечат Западен Балкан од ЕУ, Рама истакна дека не е свесен на ништо што би ја поврзало Турција со било каков облик на дестабилизација.
„Знам дека Турција е стратешки партнер на Албанија, како Грција и Италија. Турција е близок пријател на Албанија и сакаме да го засилуваме нашето партнерство. Не гледам дека Турција се обидува да го наруши европскиот курс на Западен Балкан“, рече Рама.