Published: Tuesday, September 28, 2021 15:06
Два дена по изборите и историскиот пораз на Христијанско-демократската унија ЦДУ/ЦСУ, расте притисокот врз главниот кандидат за канцелар и претседател на ЦДУ, Армин Лашет да се откаже од амбициите за формирање на влада, а се погласни се и оние што бараат негова оставка.
Сега треба понизно и со почит да ја прифатиме волјата на гласачите кои избраа промени, изјави за АРД, Бернд Алтусман, шеф на Христијанско-демократската унија (ЦДУ) за сојузната покраина Долна Саксонија.
Со таа изјава, тој се придружи на растечкиот број на истакнати членови на ЦДУ кои бараат „нов почеток“.
Ги загубивме изборите. Точка. Сега останува на СПД, на Зелените и на Либералите да се обидат да формираат нова влада, рече претседател на младинската ЦДУ, Тилман Кубан.
И членот на претседателството на ЦДУ и федерален премиер на Хесен, Волкер Буфиер смета дека Унијата не добила налог од гласачите за формирање нова влада.
Кандидатот за канцелар на овие избори и претседател на ЦДУ, Лашет и натаму инсистира на тоа дека Унијата, и покрај рекордната загуба на гласови (8,9 проценти) и историски најлошиот резултат на федерални избори (24,1 проценти освоени), треба да почне да разговара со Либерално-демократската партија (ФДП) и Зелените за составување на т.н. „Јамајка коалиција“.
Либералите и Зелените соопштија дека прво ќе разговараат меѓу себе пред да започнат преговори со една од партиите што би можела да биде поголем партнер во идната влада.