Мечевите против Турција и Грција во квалификациите за ракометното ЕП 2020 требаше да подигнат верба и самодоверба. Но, наместо тоа донесоа мисли и дилеми со каква репрезентативна иднина се соочува Македонија. По неубедливата игра што резултира со победа над Турција во Битола со 31:27 се случи фијаско во Кожани. Грција триумфира со 28:26 (полувреме 12:13) против северниот сосед кој на хартија, според традицијата и според обложувалниците важеше за апсолутен фаворит. Не дека циклусот е загубен, далеку од такво нешто, меѓутоа легитимно е прашањето дали до јануари (СП 2019 во Германија) ќе се испари „водата“ што, се чини, е навлезена до „средното уво“ кај ракометарите.
„Очигледно никој не ме сфатил сериозно по мечот во Битола. Грешките од дуелот со Турција се повторија и против Грција што резултира со срамен пораз. Ова е жешка шлаканица и предупредување за сите нас. Ништо не е загубено, но доживеавме силен удар и заслужуваме секаква критика“, рече капитенот Кире Лазаров по срамниот пораз од грчката селекција.
Македонија одигра криминално лошо со Грција во секој сегмент од ракометната игра. Го признава тоа и Раул Гонзалез кој изрази незадоволство од играта во двата правца и од неспроведувањето на договорот на дел. Истакна дека алиби нема и не треба да се бара во ништо и зад никого. Точно е, вели, дека Македонија во овие два меча беше без Филип Миркуловски, но неговото отсуство не смее да биде параван за бледиот настап со Турција ниту за денешниот пораз.
„Катастрофа. Што да кажам иако почетокот не беше таков. Но, само почетокот. Одигравме лошо и во одбрана и во напад и денеска и во четвртокот во Битола. И ние, и навивачите и вие новинарите помислувавме со колку разлика ќе триумфираме во двата меча меѓутоа не беше така лесно. Грците ни покажаа дека ракомет денеска играат сите“, рече селекторот по еден од најтешките порази во историјата на машката ракометна репрезентација на Македонија.
Исланд е со максимален ефект во третата квалификациска група по денешната победа над Турција со 33:22. Токму Исланѓаните се противници на Македонија во мечевите од третото коло што се закажани на 10 април догодина.