Твитот на македонскиот премиер Зоран Заев кој гласи „денеска од стадионот во Амстердам давам силна поддршка на македонската фудбалска репрезентација“ ги разбранува страстите во Грција и ја налути официјална Атина, па според весникот „Катимерини“ тоа било причина плус за одложување на ратификација на три меморандуми во грчкиот парламент.
Обраќањето на Заев на Твитер беше во понеделникот попладне за време на натпреварот меѓу Холандија и Македонија во последното коло од групната фаза на Европското фудбалско првенство. Македонскиот премиер беше во ВИП ложата на „Јохан Кројф“ арена на покана од неговиот холандски колега Марк Руте со кого заедно го проследија мечот.
Весникот „Катимерини“ во ударниот текст на насловната страница пишува дека Атина го повикала „премиерот на Северна Македонија целосно да го спроведе Договорот од Преспа за името на земјата во сите контексти, вклучително и меѓународните спортски настани“. Притоа е цитирана и портпаролката на Владата во Атина, Аристотелија Пелони која рече „бараме целосна имплементација на Договорот од Преспа и неговиот дух и го повикуваме Заев да се воздржи од реторика на поделби, особено во такво чувствително прашање како што е фудбалот. Во секој случај, добрата намера за спроведување на договорот е еден од критериумите за пристапување на земјата во Европската унија“.
Ратификацијата на трите меморандуми за соработка е наводно одложена за, како што стои во текстот на „Катимерини, „Заев да разбере дека има некои обврски што не може да ги игнорира“. Еден од нив се однесува на забрзување на процесот на интеграција на Северна Македонија во ЕУ, вториот е за формирање на координативен комитет за економска соработка и третиот за техничката спогодба за надгледување на воздушниот простор на земјава.