Американскиот претседател Џо Бајден вчера го потпиша Законот за привремено зголемување на лимитот на задолжување на владата на 28,9 трилиони долари, што овозможува да се зголеми долгот за државата да може да ги сервисира своите задоцнети обврски и да избегне банкрот.

Без зголемување на прагот за долгови, американското Министерство за финансии процени дека земјата на 18 октомври ќе останаше без пари за плаќање на заостанатите сметки. Зголемувањето на лимитот за задолжување за 480 милијарди долари, што го потпиша Бајден, се очекува да биде исцрпен до 3 декември, па дотогаш ќе треба да се најдат нови решенија.

Сенатот минатата недела го одобри, а Претставничкиот дом во вторникот донесе краткорочно решение за привремено зголемување на ограничувањето за можно задолжување на владата на 28,9 трилиони долари, што ќе ѝ овозможи на најголемата светска економија да избегне банкрот барем до декември.

Лидерот на републиканците во Сенатот, Мич Меконел во писмо до Бајден, по гласањето во Сенатот, напиша дека повеќе нема да им помага на демократите да го зголемат лимитот на долгот.

Меконел сака демократите да го искористат процедуралниот потег познат како помирување, за што не им се потребни републикански гласови за зголемување на прагот за задолжување, но демократите го отфрлија предлогот како можна опција.

Републиканците велат дека зголемувањето на прагот за задолжување е проблем за демократите поради пакетот мерки на Бајден за помош на граѓаните и за други цели за време на пандемијата на коронавирусот. Овој пакет, што Конгресот го прифати во првиот дел од оваа година, вреди 3,5 трилиони долари.