Претставничкиот Дом на американскиот Конгрес изгласа постапка за отповикување на претседателот Доналд Трамп. Тој се товари за злоупотреба на службената должност и попречување на конгресна истрага.
Гласањето, според светските медиуми, започнало во два часот по полноќ по европско време на кое му претходеше целодневна дебата во која законодавците беа партиски поделени што се преслика и во гласањето.
Прво се гласаше по точката за злоупотреба на власта за што беа потребни 216 гласа за Трамп да биде отповикан. „За“ гласаа 230 претставници, а „против“ 197 меѓу кои двајца демократски конгресмени додека единствениот независен се придружи кон демократите. Ниту еден конгресмен од Републиканската партија, чиј кадар е Трамп, не гласаше против.
И веќе по гласањето по првата точка, Трамп, инаку 45. претседател на САД, стана трет во историјата за кого е изгласано отповикување.
Втората точка за претседателот Трамп се однесуваше на негово попречување во работата на Конгресот за време на истрагата за телефонскиот разговор со украинскиот колега, Володимир Зеленски. И по ова прашање позитивно се изјаснија 229 конгресмени, сите републиканци беа против, а кон се приклучија и тројца демократи додека еден беше воздржан.
Злоупотреба на функцијата
Демократите го обвинуваат Трамп дека ја злоупотребил должноста барајќи од украинскиот претседател Зеленски да покрене истрага против Џо Бајден, поранешен потпретседател на САД и водечки кандидат за номинација од Демократската партија за изборите во 2020 година. За таквата услуга, според обвинението, Трамп ја условил со деблокада на воената помош за Украина.
Нареден чекор во постапката за отповикување ќе биде судење во Сенатот што е закажано за почетокот на 2020 година. Тогаш ќе се знае дали ќе биде остане на функцијата или не. Поротата ќе ја сочинуваат стотина сенатори и сенаторки, судењето му е доверено на претседателот на Врховниот суд, Џон Робертс.
За отстранување на Трамп е потребно двотретинско мнозинство, односно 67 сенатори да гласаат „за“ што, сепак, е тешко да се очекува со оглед на големата предност на републиканците во телото. Тоа би било можно само доколку 20 негови сопартијци се изјаснат „за“ што, според медиумите, е тешко изводливо.
Трамп, во меѓувреме, на Твитер упати апел до своите поддржувачи да се молат за него.
Трамп на Твитер: Можете ли да поверувате дека ќе ме отповикаат
Трамп на Твитер објави 45 постови во текот на претпладнето, пред седницата на Претставничкиот дом на американскиот Конгрес и гласањето за негово отповикување. Иако Белата куќа инсистираше дека претседателот ќе биде презафатен за да се фокусира на случувањата во Конгресот, сепак, тој мина цело претпладне со изразување на огорченост со објава на твитови и ретвитови, пренесуваат светските агенции.
„Може ли да верувате дека денеска ќе ме отповика радикалната левица, демократите кои не работат ништо, а јас не направив ништо лошо. Страшно. Читајте ги транскриптите. Ова повеќе не смее да се случи на ниту еден друг претседател. Молете се“, напиша Трамп на Твитер.
Интензитетот на реакциите на Трамп се засилуваше како што се продлабочуваше расправата во Конгресот, па почна да објавува и постови со големи букви. Портпаролката на Белата куќа, Стефани Гришам рече дека претседателот е фрустриран поради постапката за отповикување.
„Тој е фрустриран како што покажува вчерашното писмо“, изјави Гришам која алудирапе на писмото на шест страници што Трамп го испрати до претседателката на Претставничкиот дом Ненси Пелоси, а во кое ги обвини своите противници дека водат војна против него и дека сакаат да ја урнат демократијата.
Белата куќа верува во поинаков исход во Сенатот
Белата куќа, по гласањето во Конгресот, изрази убеденост дека Трамп ќе биде ослободен од Сенатот.
„Во Претставничкиот дом се одигра една од најсрамните епизоди во историјата на нашата нација“, стои во изјавата на Гришам која ги прозва демократите дека изгласале отповикување без ниту еден глас на републиканците и без докази.
Претходно, во рамки на расправата по која следеше гласање, Пелоси го нарече Трамп „закана за американската демократија“.
„Овде сме да ја браниме демократијата за народот“, рече Пелоси.
По гласањето, сепак, потврди дека обвинението ќе биде проследено до Сенатот, откако ќе ги види усвоените правила за судење, јавуваат странските агенции. Запрашана дали тоа значи дека е можно обвинението да не биде проследено до Сенатот, таа не негираше.