Аргентинскиот селектор Хорхе Сампаоли призна дека неговиот тим е под огромен психолошки притисок пред натпреварот со Франција во осминафиналето на Светското фудбалско првенство во Русија.

„Аргентина ќе игра како со „жилет меѓу забите“. Знаете какви се очекувањата во земјата и што значи  фудбалот за Аргентинците. Сите ја видовте реакцијата по пласманот во осминафинаето кој „висеше“ до последен момент. Нè очекува тежок меч што ќе зависи од нас. Мора да ја контролираме играта. Ако не го сториме тоа ќе има многу физичка борба што не н` одговара. Франција е тим кој брзо ја движи топката, игра цврст фудбал и затоа не треба да дозволиме да се растрчаат, рече Сампаоли.

„Гаучосите“ не сакаа да препуштат ништо на случајот во подготовките за дуелот со „триколорите“.  Во групната фаза прикажаа игра под очекувањата, а тројцата голмани Франко Армани, Вили Кабалјеро и Нахуел Гузман на барање на Сампаоли бранеа и пенали на последниот тренинг во репрезентативната база во Русија.

Мечот меѓу Аргентина и Франција е попладнево (16 ч.) на „Казањ арена“ во Казањ.