Шпанија е последната земја членка на НАТО која сè уште го нема ратификувано Протоколот за членство на Македонија во Алијансата. Во земјата, во првата половина на ноември, се одржаа парламентарни избори на кои победи Социјалистичката партија на Педро Санчез и се чека на формирање на новата Влада.
Новиот премиерски кабинет во Шпанија се најавува дека ќе биде формиран наскоро и по што, според неофицијални извори на НоваТВ, се очекува формалност при постапката за ратификација на Протоколот во шпанскиот Сенат.
Претпоследна земја членка што го ратификува Протоколот беше Франција што, според министерката за одбрана Радмила Шекеринска, е силна политичка порака.
За денеска во Лондон се очекува средба меѓу македонскиот премиер Зоран Заев со неговиот шпански колега, Педро Санчез во рамки на дводневниот Самит на НАТО во англиската престолнина на кој Алијансата го прославува 70. роденден од формирањето. Двајцата државници во текот на минатиот месец остварија телефонски разговор по кој Заев рече дека добил уверување од Санчез дека Владата во Шпанија наскоро ќе се формира.
Ратификацијата на протоколот во Шпанија предизвика препукување меѓу власта и опозицијата
Лидерот на ВМРО-ДПМНЕ, Христијан Мицкоски, рече дека пратеничката група ќе поднесе иницијатива во рамките на Собранието за предвремено ратификување на договорот со одложено дејство што ќе биде полноправно оној момент кога сите 29 членки ќе ја завршат процедурата, како што тоа го направила Црна Гора пред американскиот Конгрес и Сенат да ја завршат постапката.
Во ваквиот потег на најголемата опозициска партија лежи стравот дека власта, актуелната ситуација со одолговлекувањето на ратификацијата во Шпанија, сака да ја искористи за одложување на изборите планирани за 12 април наредната година. Од СДСМ велат дека нема да ја прифатат иницијативата на ВМРО-ДПМНЕ. Според социјалдемократите, додека Шпанија не го каже последниот збор, ништо конкретно нема да има во македонскиот парламент.
Сомневајќи се во намерата на лидерот на опозицијата Христијан Мицкоски, од него бараат да ги подржи измените во законот за одбрана со кои се прави стандардизација на АРМ со НАТО. Во Владата нема конкретна иницијатива околу усвојувањето на договорот со НАТО, но велат дека таквата иницијатива треба да помине на некоја од наредните владини седници, а потоа ќе се достави во Собранието.
Мицкоски од друга страна на одговорот на СДСМ возврати со обвинувања. Според него, власта по секоја цена се обидува да ги одложи изборите од кои ќе претрпи, како што вели, историски пораз. Вицепремиерката Радмила Шекеринска деновиве рече дека во случај на доцнења за ратификација на протоколот од Шпанија, предвидените избори на 12 април во 2020 година може да се одложат. Според неа, ова се прави за да не се доведе во опасност членството во НАТО.
И исклучените пратеници од ВМРО, се вклучија во дебатата и го обвинија лидерот на ВМРО-ДПМНЕ, Христијан Мицкоски за лицемерство. Побараа и негова оставка.
„Христијан Мицкоски, кој неколку пати го негира и потценува Јенс Столтенберг, Генералниот Секретар на НАТО, дека промената на името е неопходна, сега ќе наложи на пратениците да потпишат иницијатива заСеверна Македонија да отпочне ратификација за членство во НАТО“, реагираше независната осумка.