Австралија денеска соопшти дека ќе продолжи да продава јаглен „во децениите што доаѓаат“, откако се откажа од пактот за постепено укинување на загадувачките фосилни горива за запирање на катастрофалните климатски промени, јави „Бгнес“.
Повеќе од 40 земји, за време на климатскиот самит на ОН КОП26 во Глазгов, ветија дека наредните децении ќе ја укинат употребата на јаглен. Самитот се одржува со цел да се ограничи глобалното затоплување на Земјата од индустриската револуција на 1,5-2,0 степени Целзиусови.
Австралија, заедно со некои други големи корисници на јаглен, како што се Кина и САД, не се приклучија кон договорот.
Многу јасно кажавме дека нема да затвораме рудници за јаглен и нема да затвораме електрани на јаглен, изјави австралискиот министер за ресурси, Кит Пит за националната телевизија „Еј-Би-Си“.
Во одбрана на одлуката на Австралија, Пит рече дека Австралија го има еден од најквалитетните јаглени во светот.
И затоа ќе продолжиме да имаме пазари во наредните децении. И ако тие купуваат добро, ние ќе продаваме, додаде тој.
Според него, побарувачката за јаглен се очекува да расте до 2030 година.
Ако ние не го освоиме тој пазар, некој друг ќе го освои. Претпочитам тоа да биде висококвалитетен австралиски производ кој обезбедува австралиски работни места и ја гради австралиската економија отколку да доаѓа од Индонезија, Русија или од друго место, изјави австралискиот министер.
Австралија е еден од најголемите производители на јаглен и природен гас во светот, но во последниве години страда и од сè поекстремни суши, поплави и пожари предизвикани од климата.