Стивен Жерар (36) и официјално си замина од Лос Анџелес Галакси и се врати во Велика Британија. Она што засега претставува енигма е дали ќе продолжи да игра или ќе реши да стави крај на кариерата.
„Среќен сум што конечно ќе можам да минам повеќе време со семејството. Сè уште не сум одлучил каде ќе продолжам. Ќе морам да ги земам во предвид сите аспект и добро да размислам“, рече Жерар на заминување од САД.
Жерар стана слободен играч уште минатата недела по поразот на „галакси“ од Колорадо што значеше и елиминација во полуфиналето во Западната конференција во МЛС лигата. За американскиот прволигаш забележа 34 настапи, пет гола и 14 асистенции.
„Заминувам, за жал, без освоен трофеј. Горд сум, сепак, на времето минато во клубот во кој минав безброј незаборавни моменти“, порача 36 годишниот играч за врска.
Жерар од 1998 година до 2015 година настапуваше за Ливерпул и во тој период одигра 504 натпревари за тимот од „Енфилд“. Во англиските медиуми веќе се заговара негово можно враќање меѓу „црвените“, но не како фудбалер туку со функција во клупската администрација. Други, пак, пишуваат дека ќе се стави на располагање на Јирген Клоп што е најпосакувана опција и кај фановите. Меѓутоа во трка по неговите услуги се впушта Селтик и Њукасл. Последниот збор го има, се разбира, Жерар, а тој сè уште се нема произнесено околу сопствената фудбалска иднина.