Македонија вечерва го отвора седмото квалификациско поглавје за Европско фудбалско првенство. Премиерата е против Летонија на националната арена „Филип Втори“ со почеток во 20.45 часот. Пристапот останува непроменет како и формацијата во насока на единствена цел – континуитет од настапите од последните десетина натпревари вклучувајќи ги и доминантните во Лигата на нации. Но, и за победнички белег на јубилејниот 100. меч на Горан Пандев во „црвено-жолтиот“ дрес колку што претходно одигра и Гоце Седлоски.
„Деешниот фудбал не распознава лесни противници и нема лесни натпревари. Само ние да бидеме на ниво од минатите средби во што не се сомневам. Силно верувам во овие момци од кои допрва ги очекувам најдобрите партии. Ја запознавме играта на Летонците кои знаат да бидат незгодни во воздушните дуели и при прекините. Ќе мора да внимаваме во тие ситуации, но севкупно гледано подготвени сме соодветно да се спротивставиме. Размислуваме победнички и фокусирани сме само на трите бода“, истакна селекторот Игор Ангеловски.
Ангеловски на терен ќе испрати 11 играчи во офанзивен систем (4-2-3-1). На официјалната прес-конференција истакна дека го има во глава стартниот тим што, сепак, го задржа правото за лично да го соопшти на фудбалерите. Со тоа остави простор за вклучување на фантазијата и шпекулирање со фудбалерите кои ќе почнат од првата минута.
Местото меѓу стативите е резервирано за Столе Димитриевски кој додека е со репрезентативни обврски во Скопје доби нов тренер во Рајо Валјекано. На централните позиции во одбраната ќе биде Висар Муслиу во тандем, веројатно, со Кире Ристевски, десно од нив ќе биде Стефан Ристовски, а лево Езџан Алиоски. Двојката за врзување на дефанзивниот и средниот ред ќе биде Енис Барди и Елиф Елмас, пред нив Пандев, во крилните позициите Александар Трајковски и Ферхан Хасани и во шпицот Илија Несторовски.
Од комбинација за настап вечерва отпаднаа Стефан Спировски и Иван Тричковски поради повреди кои се неизвесни и за неделното гостување во Љубљана против Словенија.
„Среќен сум за јубилејот. Ми дава мотив плус за настап вечерва, но не се оптоварувам дали ќе дадам гол. Желбата ми е победа и се е подредено на тоа. Функционираме како фамилија, самодовербата е на одлично ниво и ги имаме сите услови да продолжиме каде што застанавме во Лигата на нации“, истакна Пандев.
Во групата Г вечерва ќе играат уште Австрија – Полска и Израел – Словенија.
Квалификации за ЕП 2020
Група Ц
Северна Ирска – Естонија (20.45 ч.)
Холандија – Белорусија (20.45 ч.)
Група Е
Хрватска – Азербејџан (20.45 ч.)
Словачка – Унгарија (20.45 ч.)
Група Г
Македонија – Летонија (20.45 ч.)
Израел – Словенија (20.45 ч.)
Австрија – Полска (20.45 ч.)
Група И
Казахстан – Шкотска (16 ч.)
Кипар – Сан Марино (18 ч.)
Белгија – Русија (20.45 ч.)