Граѓанската иницијатива „Шанса за Центар“ ги повика сите учесници во Советот на Општина Центар на дебата за да се зацртаат приоритетите на општината.
Кандидатот на СДСМ за градоначалник на Општина Центар, Горан Герасимовски, соопшти дека ја прифаќа поканата на граѓанската иницијатива „Шанса за Центар“ за дебата околу приоритетите во наредните четири години во општината Центар
– Како демократска партија сметаме дека секоја дебата е во интерес на подобри решенија за граѓаните и секогаш ја поддржуваме. На дебатата Герасимовски и претставниците од коалицијата ќе ги презентираат своите ставови во однос на клучните проблеми со кои се соочуваат граѓаните на општина Центар, соопшти Герасимовски преку прес – центарот на СДСМ – Општина Центар.
Инаку, денеска граѓанската иницијатива „Шанса за Центар“ ги повика на јавна дебата политичките партии кои освоија места во Советот на општината Центар. На дебатата од „Шанса за Центар“ очекуваат да се постигне консензус околу приоритетите и развојните цели за Општина Центар.
– „Шанса за Центар“ е на став дека без оглед на различните политички погледи, можеме да покажеме дека суштински разбираме што е граѓански и јавен интерес и дека можеме натпартиски да соработуваме. Соработката мора да е врз основа на издржани решенија и добри пракси за надминување на проблемите на сите граѓани. Поделбите во нашето општество не придонесуваат за развој, квалитет, ниту пак за модернизација на процесите на управување. Центарот на главниот град кој заслужува да биде европска метропола, може да се развива само преку обединување на сите сили во полза на граѓанските интереси, наведуваат од граѓанската иницијатива „Шанса за Центар“.
Од граѓанската иницијатива напоменаа дека нема да коалицираат со ниту една партија во Советот на Општина Центар, туку може само да соработува тоа значи развој на Општината.
Во Советот на Општина Центар најмногу членови, според освоените гласови од локалните избори, ќе има СДСМ, потоа следуваат ВМРО – ДПМНЕ, Левица и „Шанса за Центар“.