Специјалниот германски пратеник за Македонија Јоханес Хајндл утре пристигнува во Скопје, дознава НОВА.

Неофицијално, на неговата агенда се средби со лидерите на четири политички партии – потписнички на Договорот од Пржино, но засега не е предвидена средба со претседателот Ѓорѓи Иванов.

Како што минатата недела соопштија од германското МНР, специјалниот пратеник, во координација со претставниците на Европската Унија и на САД во земјава ќе посредува во решавањето на кризата.

Портпаролот на министерството за надворешни работи на Германија, Мартин Шефер минатата недела изјави дека изборот на актуелниот германски амбасадор во Виена за специјален претставник на Германија во Македонија ја одразува посветеноста на Федералната влада во Берлин за напредокот на Западeн Балкан.

„Внатрешната политичка ситуација во Македонија е причина за загриженост во Германската федерална влада. Затоа министерот за надворешни работи Франк Валтер Штајнмаер одлучи да именува личен пратеник за состојбите во Македонија при што од амбасадорот Јоханес Хајндл побара да ја преземе оваа функција. Амбасадорот Хајндл од сега ќе работи заедно со Европската комисија, САД и со други партнери и ќе дава поддршка во нивната медијација за надминнување на политичката криза“, изјави денеска Шефер во Берлин.

Во биографијата на Јоханес Хајндл стои дека тој е роден во 1956 година во Минхен. Бил новинар, дипломат, а од јули 2015 година и амбасадор на Германија во Австрија. Претходно, тој бил шеф на политичкиот оддел и претставник во Комитетот за политика и безбедност (ПБК) на Постојаната мисија на Германија во Европската Унија.

Тој бил вработен во германската амбасадата во Југославија, потоа преку размена на претставници бил во американскиот Стејт департмент, а потоа и заменик-шеф на специјалните сили Западен Балкан при германското МНР.

Хајндл помеѓу 2001 и 2004 година бил шеф на одделот за Западен Балкан, а потоа до 2006 година бил претставник за Југоисточна Европа и Турција во Министерството за надворешни работи, пред да биде назначен за заменик-шеф на мисијата во САД од 2009 година

Од 3 септември 2009 година до 2011 година тој бил амбасадор во Чешка, а од јули 2015 година е германски амбасадор во Австрија.