Времетраењето на еден фудбалски натпревар е 90 минути, но топката никогаш толку не е во игра. Педантните статистичари во соработка со шпанскиот весник „Марка“ пресметаа дека Примера е најслаба во таа категорија од петте најсилни национални првенства во Европа.

Од час и половина топката на шпанските тревници е во игра 54 минути што е најмала минутажа во однос на Премирлигата, Бундеслигата, Серија А и Лига 1. Како главен главен фактор за толкаво губење на време се издвојуваат големиот број на прекршоци, помали судиски продолженија во просек, чести негодувања и расправии на фудбалерите со арбитрите.

Најмногу со топка во 2016 година се играло во Серија А. Ефективен фудбал во Италија имало 57 минути во просек по натпревар. На второто место е француската лига, па германската и англиската. Во Серија А, Лига 1, Бундеслига и во Премиерлига просекот, сезони наназад, е над 54 минути. Таа бројка Шпанците ја достигна во 2015 година иако според некои пресметки се играло само 48 минути.