Распадот на Југославија очигледно бил тема во дел од тензичните безбедносни разговори меѓу претставници на НАТО и на Русија кои траеја околу четири часа на што упатува и огласувањето на генералниот секретар на Алијансата, Јенс Столтенберг.

Југославија не се распадна поради НАТО. За тоа имаше неколку внатрешни причини, а НАТО дојде подоцна за да ја запре војната во Босна и Херцеговина. НАТО не менуваше граници на Балканот, границите се менуваа од внатрешни причини. НАТО беше тука за да заштити луѓе и тоа на овој состанок го потврдија и државите кои ја сочинуваа поранешна Југославија, а кои денеска се членки на НАТО, рече Столтенберг, пренесува порталот кликс.ба.

Тој додаде дека „НАТО е одбранбена организација“.

Никогаш не сме присилувале никого на членство. Ширењето на НАТО никогаш не било агресивно. Државите членки на поранешниот Варшавски пакт одлучија да се придружат во НАТО, бидејќи истакнаа дека тоа им дава сигурност, наведе Столтенберг.

Тензиите меѓу западните сојузници и Русија траат во последните неколку месеци, откако Русија распореди околу 100.000 војници на границата со Украина. Официјална Москва го обвинува Западот дека не ја уважил итноста на нејзините барања и укажува дека не е подготвена да дозволи преговорите да траат неодредено време.

Руската страна е незадоволна поради зголемување на бројот на членки на НАТО на 30, во споредба со периодот на Студената војна кога имаше 16, како и придружување на голем број на членки од поранешниот Источен блок што го предводеше поранешниот СССР.