Марко Арнаутовиќ ќе куртули од истрага во Европската фудбалска асоцијација (УЕФА) за личните навреди кон Езџан Алиоски во мечот меѓу Македонија и Австрија на ЕП 2020. Напаѓачот на австриската селекција не чекаше премногу и по натпреварот го посетил Алиоски во соблекувалната и се извинил, разговарал и со капитенот Горан Пандев, а јавно извинување напиша и преку Инстаграм.
– Среде емоции за време на натпреварот имаше некои жешки зборови за што би сакал да се извинам, особено на моите пријатели од Македонија и од Албанија. Не сум расист, напиша австрискиот репрезентативен напаѓач со српско потекло на Инстаграм на македонски и на албански јазик.
Фудбалската федерација на Македонија веднаш се обрати до УЕФА со допис во кој побара истрага и казна за односот на Арнаутовиќ конј Алиоски, но како што пишува СИД, германска спортска агенција, и тамошните медиуми, УЕФА не планира истрага против Австриецот. Таквата информација за СИД ја потврдил и портпаролот на УЕФА, без да ги наведе причините.
Дека страстите се смириле, потврди и Алиоски во интервју за албански медиуми.
– Разговаравме со Арнаутовиќ по мечот и ги расчистивме работите. Се извини, дојде и во соблекувална, ми подаде рака што беше навистина фер и коректен потег од него, истакна Алиоски.