„Фајзер“ ќе проучува ефикасност на својата вакцина против ковид-19 со вакцинирање на целото население над 12 години во град во јужен Бразил, соопшти компанијата.

Истражувањето ќе се спроведе во Толедо, кој има 143.000 жители, во западниот дел на државата Парана, во соработка со Бразилската национална програма за вакцинација, соопштија локалните здравствени власти, болницата и федералниот универзитет.

„Фајзер“, кој ја разви вакцината со германскиот партнер „БајонТек“, соопшти дека целта е да се проучи преносувањето на коронавирусот во „реално сценарио“ откако ќе се вакцинира населението.

Иницијативата е прва и единствена од ваков вид што се презема во соработка со фармацевтска компанија во земја во развој, соопштија од „Фајзер“.

Има мал отпор кон вакцината во Толедо, иако 98 проценти од населението прими прва доза, претежно од „Фајзер“/„БајонТек“. Вакцината на „АстраЗенека“ и на „Синовак“ против ковид-19, исто така, се користеше, информира општинската секретарка за здравство, Габриела Кучерски, додавајќи дека 56 проценти од населението е целосно вакцинирано.

Реџис Гуларт, истражувач во болницата Моинхос де Венто во Порто Алегре, кој учествува во студијата, рече дека целта е да се потврди вистинската ефикасност и безбедност на вакцината која е веќе клинички тестирана.

Истражувањето, исто така, ќе овозможи долгорочно следење на учесниците со помош на одговори на прашања како што се времетраењето на заштитата од вакцината против ковид-19 и нови варијанти на вирусот, рече Гуларт.