Британската Агенција за здравствена безбедност (УКХСА) објави податоци за точноста на заштита по прва, втора и трета доза на вакцина против ковид-19, потпирајќи се на собраните информации за време на растот на случаи со Омикрон сојот.
Утврдено е дека, иако вакцините многу помалку штитат од инфекција со омикрон сојот отколку со Делта, заштитата од хоспитализација останува висока.
Заштитата од хоспитализација со време ослабува по втората примена доза, но повторно се зголемува со бустер доза.
Студијата е засновата на податоци меѓу 27 ноември и 24 декември во 2021 година и дава први формални проценки на ефикасноста на бустер дозата на вакцина против тешки форми на болеста, објави Ерик Топол, директор на Транслацискиот институт за истражување „Скрипс“.
Ова е статистиката
За хоспитализација (комбинирани податоци за сите видови на вакцини)
- Една доза – 52 отсто намален ризик за хоспитализација во споредба со невакцинираните
- Две дози – намалување за 72 отсто во рок од 24 недели од втората доза
- Две дози (долгорочно) – 52 отсто намален ризик по 24 недели од втората доза
- Три дози – 88 отсто намален ризик по две недели од третата доза
За симптоматска болест (комбинирани податоци за сите видови на вакцини)
- Една доза – 26 отсто намалување на ризикот од симптоматски ковид во рок од четири недели по првата доза
- Две дози – намалување за 18 отсто во рок од 24 недели по втората доза
- Две дози (долгорочно) – намалување за два отсто по 24 недели од втората доза
- Три дози – 63 отсто намален ризик по две недели од третата доза
Во Велика Британија, се нагласува, се употребуваат вакцините на „АстраЗенека“, на „Фајзер“ и на „Модерна“, па податоците може да се разликуваат во земјите кои користат поинаков сет за имунизација.
Мнозинството граѓани во Обединетото Кралство ја доби вакцината на „АстраЗенека“ која, на пример, не ја користат во САД, додека Велика Британија, пак, никогаш не ја користеше еднократната вакцина на „Џонсон&Џонсон“.
Се чини дека наодите потврдуваат оти вакцинацијата и бустерите се ефикасни средства против Омикрон, сој кој зема замав во светот и се заканува да ги доведе здравстените системи до „ивица на колапс“, неодамна соопшти Светската здравстена организација (СЗО).
Сè уште не е јасно колку ќе трае заштитата од бустер дозата. УКХСА претходно извести дека заштитата од симптоматска болест опаѓа по десет недели од 70 отсто на 45 отсто по апликација на бустер доза на „Фајзер“ по две примени дози од истата вакцина.