Филип Талески, за разлика од претходните неколку настапи, имаше одлична вечер во Рејкјавик. Ракометарот на Рајн Некар Левен вгради пет гола во првата победа на македонската репрезентација на исландска почва (34:33) од кои четирипати ја тресеше противничката мрежа во второто полувреме во моменти во кој мечот лесно можеше да тргне во една или во друга насока. Презеде одговорност каква што се очекуваше и многупати досега од него и не погреши.
„Мора да бидеме задоволни од оваа победа. Одигравме меч со многу примени погодоци, но доста и постигнавме. Воведните 15-тина минути беа послаби во одбрана и Исланѓаните лесно нè пробиваа. Но, на полувреме се договоривме да смениме формација од 5-1 во 6-0 во дефанзива и да играме трпеливо, до гол, во напад. Тоа даде резултат“, истакна Талески по големиот триумф во Рејкјавик.
Но, Талески се осврна и на некоректен однос на јавноста кон ракометарите. Ја подотвори душата и изрази револт што репрезентацијата била мета на критики во изминатиот период.
„Револтиран сум што македонската јавност плука по нас. Јас од тоа влечам мотивација плус бидејќи знам дека можам и морам подобро и да бидам еден од носителите на игра на оваа репрезентација заедно, се разбира, со капитенот Кире Лазаров“, додаде Талески.
За Македонија ова е втора победа во квалификациите за Европското првенство во 2020 година со која целосно е анулиран изненадувачкиот пораз од Грција во Кожани. Реваншот против Исланд е веќе во недела во салата „Борис Трајковски“ со почеток во 20 часот.